İdarəetmə Sistemləri İnstitunun əməkdaşı Məlahət Murtuzayevanın anadan olmasının 70 ili tamam olur

05.03.2022 / Maraqlı məlumatlar

6 mart 2022-ci ildə İdarəetmə Sisteləri İnstitunun “İqtisadiyyatın qeyri-səlis modelləri” laboratoriyasının böyük elmi işçisi, iqtisad üzrə fəlsəfə doktoru Məlahət Mustafa qızı Murtuzayevanın anadan olmasının 70 ili tamam olur.

Murtuzayeva Məlahət Mustafa qızı 1952-ci ildə Azərbaycan Respublikasının Gəncə şəhərində anadan olmuşdur. 1959-1969 cu illərdə Bakı şəhəri 190 №-li orta məktəbini qızıl medalla bitirmiş, həmin il S.M.Kirov adına Azərbaycan Dövlət Universitetinin (indiki Baki Dövlət Universiteti) mexanika-riyaziyyat fakültəsinə daxil olmuşdur. 1974-cü ildə universiteti qırmızı diplomla bitirmiş və AMEA-nın Kibernetika İnstitutunda (indiki İdarəetmə Sistemləri İnstitutu) böyük laborant vəzifəsiylə əmək fəaliyyətinə başlamışdır.

1978-1982-ci illərdə AMEA-nın aspiranturasının əyani şöbəsinə daxil olmuşdur. 1986-cı ildə “Kompleks iqtisadi-riyazi istehsal amillərinin təhlili və Azərbaycan SSR-nın Ağdam rayonunun timsalında regionda kənd təsərrüfatının strukturu” mövzusunda dissertasiya işini müdafiə etmiş və iqtisad üzrə fəlfəfə doktoru adını almışdır. M.Murtuzayeva 1993-cü ildən Kibernetika İnstitutunda (İSİ) böyük elmi işçi vəzifəsində çalışır. İnstitutun “Makroiqtisadi proqnozlaşdırma” laboratoriyasında çalışan dövrlərdə bir çox elmi məqalələrin müəllifi olmuşdur. M.Murtuzayeva, həmçinin 2007-2009-cu illərdə Bakı Dövlət Universitetində müəllim kimi çalışmışdır.

O işlədiyi müddətdə laboratoriyada aparılan elmi-tədqiqat işlərində fəal iştirak etmiş, İqtisadiyyatın qeyri-səlis modellərinin qurulması istiqamətində, makroiqtisadi göstəricilərin modelləşdirilməsi istiqamətində L.Zadənin qeyri-səlis riyaziyyat nəzəriyyəsinin tətbiqi ilə bağlı bir sıra məsələlərin həllində yaxından iştirak etmişdir.

Məlahət Murtuzayevanı 70 illik yubileyi münasibətilə təbrik edir, ona möhkəm can sağlığı və yeni  uğurlar arzulayırıq!