“Şuşanın Rəqəmsal Müəllimləri” layihəsinin açılış mərasimi keçirilib

09.03.2022 / Mühüm xəbərlər

6 mart 2022-ci il tarixində Azərbaycan Gənc Müəllimlər Assosiasiyasının (AGMA) təşkilatçılığı ilə 1 fevral - 30 aprel tarixlərində icra olunacaq “Şuşanın Rəqəmsal Müəllimləri” layihəsinin açılış mərasimi keçirilib. Tədbirdə Millət vəkili Etibar Əliyev, Bakı Şəhər Təhsil İdarəsinin İctimaiyyətlə əlaqələr sektorunun müdiri Bəşarət Məmmədov, Azərbaycan Milli Elmlər Akademiyası (AMEA) İdarəetmə Sistemləri İnstitutunun (İSİ) elmi işçisi və doktorantı Səyyarə Hidayətzadə, Şuşa Rayon Təhsil Şöbəsinin müdiri Rəsmiyyə Məmmədova iştirak ediblər.

Tədbiri giriş nitqi ilə açan AGMA-nın sədri Rüfət Əsədzadə təşkilat haqqında qısa məlumat verib və AMEA-nın İdarəetmə Sistemləri İnstitutuna layihədə göstərdikləri təmənnasız dəstəyə görə minnətdarlığını bildirib. O, qeyd edib ki, Azərbaycan Respublikasının Qeyri - Hökumət Təşkilatlarına Dövlət Dəstəyi Agentliyinin maliyyə yardımı ilə həyata keçirilən layihənin əsas məqsədi distant təhsilin təşkili prosesində müəllimlərdə “Google for Education” platformasından istifadə bacarıqlarını formalaşdırmaqdan ibarətdir.

Sonra çıxış edən layihə rəhbəri Hüseyn Hüseynov 2022-ci Şuşa ilində həyata keçirilən “Şuşanın Rəqəmsal Müəllimləri” layihəsi haqqında ətraflı məlumat verərək onun əhəmiyyətini vurğulayıb və iştirakçıların suallarını cavablandırıb.

Daha sonra İSİ-nin əməkdaşı Səyyarə Hidayətzadə çıxış edərək müasir dövrün tələblərinə uyğun yüksək ixtisaslı kadrlar yetişdirməyin önəmini vurğulayıb, bu istiqamətdə əldə ediləcək uğurlar naminə insitut əməkdaşlarının dəstək göstərməyə daim hazır olduqlarını bildirib.

Qeyd edək ki, layihəyə müraciət edən  300 müəllimdən 50-si seçilərək təlimlərə cəlb edilib.