İdarəetmə Sistemləri İnstitutunda magistrantların attestasiyası keçirilib
10.03.2022 / Tədbirlər10 mart 2022-ci il tarixində AMEA İdarəetmə Sistemləri İnstitutunda (İSİ) “Kompüter elmləri” və “Proseslərin avtomatlaşdırılması mühəndisliyi” ixtisasları üzrə təhsil alan I və II kurs magistrantların attestasiyası keçirilib.
Attestasiya Komissiyasının iclası İSİ-nin icraçı direktoru, AMEA-nın müxbir üzvü Əminağa Sadıqovun sədrliyi ilə keçirilib. Alim qeyd edib ki, müasir dövrün tələblərinə cavab verən yüksək ixtisaslı kadrların hazırlanması AMEA-da, o cümlədən İSİ-də prioritet məsələlərdəndir. Bu istiqamətdə institutun peşəkar alimləri mütəmadi olaraq magistrantlarla bilik mübadiləsi aparır, elmi və pedaqoji təcrübələr həyata keçirilir. Attestasiyanın keçirilməsinin əhəmiyyətindən söz açan Ə.Sadıqov gənclərə elmi işlərində və gələcək fəaliyyətlərində uğurlar arzulayıb, tövsiyyələrini səsləndirib.
Sonra magistrantlar öz dissertasiya işlərinin mövzularına uyğun olaraq fərdi iş planlarında nəzərdə tutulan elmi-tədqiqat işlərinin yerinə yetirilməsinin gedişatı, konfranslarda iştirak, elmi işlərin dərc olunması haqqında məlumat veriblər.
Komissiyanın üzvü, İnstitutun Təhsil şöbəsinin müdiri, r.ü.f.d. Sevinc Quliyeva komissiya üzvlərini magistrantların qış imtahan sessiyasının nəticələri ilə tanış edib.
Daha sonra magistrantın gördüyü işlər ətrafında geniş müzakirələr aparılıb, müəyyən fikirlər səsləndirilib, suallar cavablandırılıb. Müzakirələrdə komissiya üzvləri – İSİ-nin elmi katibi Zəhra Əzizova, dosentlər Rəna Əsədova, Elxan Səbziyev, Rəşad Məstəliyev, Tahir Əlizadə və r.e.d. İlqar Məmmədov iştirak edib, tövsiyyələrini səsləndiriblər.
Yekunda Attestasiya Komissiyası tərəfindən magistrantların növbəti semestrə keçirilməsi barədə qərar qəbul edilib.