AMEA-nın Rəyasət Heyəti adından Novruz bayramı münasibətilə Akademiya əməkdaşlarının təbriki
20.03.2022 / Mühüm xəbərlər
Hörmətli həmkarlar!
Sizi Novruz bayramı münasibətilə səmimi qəlbdən təbrik edir, xalqımız üçün daim əziz olan və əsrlərdir yaşadılan bu bayramın Sizə, ailənizə və doğmalarınıza xoş günlər, cansağlığı, səadət və süfrələrinizə bol ruzi bərəkət gətirməsini arzulayırıq.
Baharın gəlişinin müjdəçisi olan Novruz bayramı uzun əsrlərdən bəri nəsillərdən-nəsillərə ötürülərək yaşadılmış, bütün dövrlərdə zamanın sınağından çıxaraq yurdumuzun hər bir guşəsində geniş şəkildə qeyd edilmiş, xalqımızın birliyinin qorunmasına öz misilsiz töhfələrini vermişdir. Eyni zamanda özündə ehtiva etdiyi “milli bayram” statusu ilə milliözünüdərkin formalaşmasında və xalqımızın təfəkkürünün inkişafında, eləcə də adət-ənənələrimizin, milli-mənəvi dəyərlərimizin qorunub saxlanılmasında mühüm rol oynamışdır. Heç şübhəsiz, daim insanları barışığa, sülhə, mehribanlığa səsləyən Novruz bayramı xalqımızın mənəviyyatını humanizm, multikulturalizm ideyaları ilə zənginləşdirmişdir və nəticədə ölkəmizdə bütün xalqların nümayəndələri əsrlərdir əmin-amanlıq, həmrəylik içərisində yaşayırlar.
Böyüyündən kiçiyinə hər bir azərbaycanlının sevdiyi Novruz bayramına olan rəğbətini xalqımız şifahi və yazılı ədəbiyyatımızda, musiqimizdə, incəsənətimizdə daim geniş yer verərək göstərmişdir.
Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban xanım Əliyevanın ciddi səyləri nəticəsində, 2009-cu ildə Novruz bayramı UNESCO-nun Bəşəriyyətin Qeyri-Maddi Mədəni İrs üzrə Reprezentativ siyahısına daxil edilmişdir.
Qeyd etmək lazımdır ki, son illərdə Novruz bayramı, onun tarixi və adət-ənənələri ilə bağlı Azərbaycan Milli Elmlər Akademiyasının bir sıra müəssisələrində mühüm tədqiqatlar aparılmış, əldə edilən nəticələr kitab, monoqrafiya və məqalə formasında çap edilmiş və bu bayramın gələcək nəsillər üçün yaşadılması istiqamətində ciddi addımlar atılmışdır.
Əziz həmkarlar!
Sizi Novruz bayramı münasibətilə bir daha təbrik edir, sağlam, xoşbəxt günlər arzulayır, elmi, elmi-təşkilati yaradıcılığınızda uğurlar diləyirik!
AMEA-nın Rəyasət Heyəti
