İdarəetmə Sistemləri İnstitutunda işçilərin attestasiyasına start verilib

14.04.2022 / Tədbirlər

AMEA İdarəetmə Sistemləri İnstitutunda (İSİ) işçilərin attestasiyasına başlanılıb. Attestasiya işçilərin peşəkarlıq səviyyəsinin yoxlanılması, onların tutduqları vəzifəyə uyğunluğunun müəyyənləşdirilməsinə hədəflənmişdir.

Attestasiyanın həyata keçirilməsi məqsədilə İSİ-nin icraçı direktoru, AMEA-nın müxbir üzvü Əminağa Sadıqovun sədrliyi ilə 9 nəfərdən ibarət attestasiya komissiyası yaradılaraq attestasiyadan keçiriləcək işçilərin siyahısı müəyyən edilmiş, müvafiq sənədlər hazırlanmışdır.

Attestasiya komissiyasının ilk iclasını açan Ə.Sadıqov attestasiyanın Azərbaycan Respublikasının Nazirlər Kabineti tərəfindən təsdiq edilmiş “Azərbaycan Respublikasında işçilərin attestasiyasının keçirilməsi Qaydaları”na, Əmək Məcəlləsi və Elm Qanununun müvafiq müddəalarına əsasən AMEA Rəyasət Heyətinin tövsiyəsi ilə keçirildiyini qeyd edib. O,attestasiyanın işçilərin peşəkarlıq səviyyəsinin müəyyənləşdirilməsi, optimal yerləşdirilməsi, onların əməyinin düzgün qiymətləndirilməsi,stimullaşdırılması və səmərəli istifadəsi baxımından önəmini vurğulayraq bu prosesin AMEA-da aparılan islahatlarının tərkib hissəsi olduğunu, elmi müəssisələrin fəaliyyətinin daha da təkmilləşdirilməsi, onun nəticəliliyin artırılmasına yönəldiyini qeydetmişdir.

Ə.Sadıqov komissiya üzvlərini onların hüquq və vəzifələri, attestasiyanın prosedur qaydaları ilə bir daha tanış etmiş, tövsiyələrini səsləndirmişdir.

Attestasiya zamanı komissiya üzvləri tərəfindən işçilərə onların vəzifəsinə, əmək funksiyalarına, ixtisasına, habelə yerinə yetirdikləri işlər və onların nəticələri barədə suallar verilmiş, bir sıra tövsiyələr səsləndirilmişdir.