“Qərarvermədə gənclərin iştirakı”na həsr olunmuş dəyirmi masa keçirilib
28.04.2022 / Maraqlı məlumatlar“Avropa İttifaqı Gənclər üçün” proqramı ilə əməkdaşlıq çərçivəsində Gənclər və İdman Nazirliyi, “Education HUB” və “Gender HUB” sosial platformalarının birgə təşkilatçılığı ilə aprelin 22-23-də “Qərarvermədə gənclərin iştirakı”na həsr olunmuş dəyirmi masa keçirilib. Tədbirdə dövlət qurumlarını, gənclər təşkilatlarını, gənclər evlərini və müxtəlif regionları təmsil edən 45 gənc iştirak edib.
Proqrama uyğun olaraq müzakirələr gənclər siyasətinin həyata keçirilməsində sektorlararası əməkdaşlığa gənclərin daha inklüziv cəlb edilməsi, gənclərin məşğulluğu və sosial sahibkarlığı və gender bərabərliyi mövzularına həsr olunub. 2 gün davam edən dəyirmi masada aşağıdakı istiqamətlər üzrə müzakirələr və qruplara işlər aparılıb:
- ''Struktur dialoq nədir?'' - gənclərin fəal iştirakı üçün konstruktiv rəy və fəal dinləmə proseslərinə giriş;
- Qərarların qəbul edilməsində iştirakçılıq (iştirak pilləkanı metodu) və inklüziv yanaşmaya giriş (seqreqasiya, istisna, daxilolma və inteqrasiya şərtlərinin araşdırılması);
- Gənclərin çoxşaxəli iştirakı: Azərbaycanda gənclərin iştirakıçılığı üçün çərçivənin birgə yaradılması, gənclərin iştirakının arzuolunan səviyyəsinə dair qrup müzakirələrinin nəticələrinin təqdimatı;
- Gənclərlə bağlı mövcud qərar qəbuletmə proseslərinin xəritələşməsi: daha detallı və irəliyə doğru addımlar;
- Birgə quruculuq və birgə idarəetmə: Azərbaycanda gənclər üçün gənclərlə birlikdə. Əvvəlki sessiyalardan toplanmış tövsiyələrin və xəritələşmə tapşırıqlarının təqdimatı.
Tədbirdə gənclər və idman nazirinin müavini İndira Hacıyeva, Kiçik və Orta Biznesin İnkişafı Agentliyinin İdarə heyətinin sədri Orxan Məmmədov, Dövlət Məşğulluq Agentliyinin İdarə heyətinin sədri Mustafa Abbasbəyli, Gənclər Fondunun icraçı direktoru Fərid Cəfərov və millət vəkili Nigar Arpadarai çıxış edərək mövzularla bağlı fikirlərini və tövsiyələrini bildiriblər.
Qeyd edək ki, tədbirdə AMEA İdarəetmə Sistemləri İnstitutunun Gənc Alim və Mütəxəssislər Şurasının sədri, elmi işçi Lamiyə Nəcəfova "Azərbaycan Gəncliyi 2022-2026-cı illərdə" gənclər siyasətinin formalaşması üçün təklif və tövsiyələrin hazırlanmasında iştirak etmişdir.