AMEA İdarəetmə Sistemləri İnstitutu ilə Litvanın “İnta” QSC arasında əməkdaşlıq memorandumu imzalanıb
19.05.2022 / Mühüm xəbərlər19 may 2022-ci il tarixində AMEA İdarəetmə Sistemləri İnstitutu (İSİ) ilə Litvanın “İnta” Qapalı Səhmdar Cəmiyyəti (QSC)arasında əməkdaşlıq və birgə fəaliyyət haqqında memorandum imzalanıb.
Görüş zamanı İSİ-nin baş direktoru, akademik Əli Abbasov bildirib ki, imzalanan memorandumun məqsədi elektron logistika sistemləri, rəqəmsal nəqliyyat dəhlizləri, koordinasiya və elektron ticarət platformaları yaratmaqla nəqliyyat və logistika proseslərinin idarə edilməsi və rəqəmsallaşdırılması məsələlərində hər iki ölkənin elmi-tədqiqat müəssisələri ilə ayrı-ayrı alimləri arasında birgə qarşılıqlı faydalı elmi fəaliyyətləri təşviq etməkdir. Qeyd edib ki, bu istiqamətdə EU4Digital proqramının layihə fəaliyyətlərinin həyata keçirilməsi üçün səylərin birləşdirilməsi, o cümlədən birgə təkliflərin hazırlanması və çox tərəfdaşlı layihə konsorsiumlarının formalaşdırılması nəzərdə tutulur.
“İnta” QSC-nin baş direktoru Vytautas Vitkauskas Litva və Azərbaycan arasında ikitərəfli əməkdaşlıq və dostluq əlaqələrinin inkişaf etdirilməsi istiqamətində elektron logistika və rəqəmsal nəqliyyat dəhlizləri sahələrində qurulan əlaqələrin konkret elmi məqsədlərə nail olmaq üçün səmərəli olacağını bildirib. O, təmsil etdiyi qurumla İSİ arasında sözügedən sahələrdə qurulan, qarşılıqlı texniki və iqtisadi maraqlara əsaslanan əməkdaşlığın yeni inkişaf perspektivləri yaradacağına əminliyini ifadə edib.
Əməkdaşlıq çərçivəsində tərəflərin birgə tədqiqat layihələri və qısamüddətli təcrübə mübadiləsi üçün qarşılıqlı səfərlər həyata keçirilməsi nəzərdə tutulur.