Cənubi-Ural Dövlət Universitetinin əməkdaşları İdarəetmə Sistemləri İnstitutunun qonağı olublar
25.05.2022 / Mühüm xəbərlər24 may 2022-ci il tarixində Azərbaycan Respublikasında ezamiyyətdə olan Rusiya Federasiyasının Çelyabinsk şəhərində yerləşən Cənubi-Ural Dövlət Universitetinin əməkdaşları, “İnformasiya ölçmə texnikası” kafedrasının müdiri, “Xüsusi metallurgiya resursları mərkəzi”nin rəhbəri, t.e.d., prof. Samodurova Marina Nikolayevna və rektorun məsləhətçisi Çepurnov Leonid Nikolayeviç AMEA İdarəetmə Sistemləri İnstitutunun (İSİ) qonağı olublar.
Qonaqları İSİ-nin baş direktoru, akademik Əli Abbasov qəbul edib. Ə.Abbasov müasir tələblərə cavab verən, müxtəlif elmi istiqamətlər üzrə əməkdaşlığın önəmini vurğulayıb, gələcək perspektivlərlə bağlı ikitərəfli əlaqələrin inkişafı və aparılan işlərlə yaxından tanışlıq üçün tövsiyələrini səsləndirib.
Görüşdə, həmçinin İntellektual informasiya-ölçmə sistemləri laboratoriyasının müdiri, t.ü.f.d., dosent Məzahir İsayev iştirak edib. Sözügedən müəssisələr arasında elmi əməkdaşlığın qurulması, birgə layihələrin həyata keçirilməsi, yüksək ixtisaslı elmi kadrların hazırlanması istiqamətində fikir mübadiləsi aparılıb.
Qeyd edək ki, qonaqlar Azərbaycanın digər elm və təhsil ocaqlarının da fəaliyyəti ilə tanış olacaqlar.