İdarəetmə Sistemləri İnstitutunun rəhbərliyi beynəlxalq elmi konfransda iştirak edib
16.06.2022 / Mühüm xəbərlər12-13 iyun 2022-ci il tarixlərində Türkmənistan Respublikasının Aşqabad şəhərində “Elm, texnika və innovasiya texnologiyaları dövründə qüdrətli bir dövlətin yeni intibah dövrü” adlı Beynəlxalq Elmi Konfrans onlayn formatda keçirilib.
AMEA İdarəetmə Sistemləri İnstitutunun (İSİ) baş direktoru, akademik Əli Abbasov 12 iyun 2022-ci il tarixində konfransın plenar iclasında “Problems and perispectivies of creating computer processing systems for natural languages with low information resources” (“Azrəqəmsal resurslu təbii dillərin kompüter emalında problemlər və perspektivlər”) adlı məruzə ilə onlayn formatda çıxış edib. Akademik rəqəmsal linqvistik resursları məhdud olan dillərin süni intellekt metodlarının tətbiqi ilə Azərbaycan dili üzrə aparılan və əldə olunan nəticələri, tətbiq işlərini konfrans iştirakçılarının diqqətinə çatdırıb.
Ə.Abbasov qeyd edib ki, yaradılmış sistem Azərbaycan dilində nitqin tanınması və başa düşülməsi, avtomatik tərcüməsinin təhlili və digər funksiyaları həyata keçirməyə imkan verir. Bildirib ki, sistemin eyni zamanda robot-operatorun yaradılması və çağrı mərkəzlərində media monitorinqində, virtual köməkçinin və virtual müəllimin yaradılmasında istifadə olunması əsaslandırılıb.
Akademik çıxışının sonunda sistemin digər türk dilli ölkələr də tətbiq imkanları barədə konfrans iştirakçılarına ətraflı məlumat verib.
Konfransın növbəti günü İSİ-nin icraçı direktoru, AMEA-nın müxbir üzvü Əminağa Sadıqov “İnformasiya və kommunikasiya sistemləri, kompüter texnologiyaları, dəqiq elmlər” bölməsində “Fövqəladə hallarda insanın hərəkətlərinin və psixofiziki reaksiyalarının modelləşdirilməsi” mövzusunda məruzə edib. Alim qeyd edib ki, FH-da xilasedici komandanın rəhbər heyəti və üzvlərinin yüksək təhlükə şəraitində işləyərkən davranış istiqamətlərini proqnozlaşdırmaq çətinləşir. Bu səbəbdən komanda rəhbərinin baş verə biləcək mümkün situasiyalara öncədən hazır olması insanların həyatını, sağlamlığını və əmlakını daha etibarlı xilas etməyə imkan yarada bilər. Ə.Sadıqov bu istiqamətdə aparılmış tədqiqatlar nəticəsində FH-da insanın hərəkətlərinin və psixofiziki reaksiyalarının modelləşdirilməsi üçün işlənən elmi-metodiki təminat barədə tədbir iştirakçılarına ətraflı məlumat verib.