Sənaye Tətbiqli İdarəetmə və Optimallaşdırma VIII Beynəlxalq konfransı keçiriləcək
22.08.2022 / Mühüm xəbərlər24-26 avqust 2022-ci il tarixlərində Azərbaycan Respublikası Rəqəmsal İnkişaf və Nəqliyyat Nazirliyinin dəstəyi ilə Sənaye Tətbiqli İdarəetmə və Optimallaşdırma (COIA) VIII Beynəlxalq konfransı keçiriləcək.
Sözügedən konfrans idarəetmə və optimallaşdırma sahəsində dünyanın müxtəlif ölkələrindən olan tədqiqatçılar və praktikantlar üçün müzakirə və fikir mübadiləsi baxımından geniş imkanlar yaradacaq. Konfransın mövzularına “İdarəetmə nəzəriyyəsi”, “Optimallaşdırma”, “İntellektual sistemlər”, "Fazi idarəetmə”, “Şəbəkə və telekommunikasiya”, “Ədədi və hesablama metodları”, “Riyazi modelləşdirmə və simulyasiya”, “Sənaye və iqtisadiyyatda tətbiqlər”, “İdentifkasiya”, “Fiziki problemlərdə optimallaşdırma prosedurlarının tətbiqi” kimi istiqamətlər daxildir.
Qeyd edək ki, konfransın 24 avqust 2022-ci il tarixində “Hilton Baku” otel kompleksində keçiriləcək açılış tədbirində AR Rəqəmsal İnkişaf və Nəqliyyat nazirinin müavini Rövşən Rüstəmov, ABŞ Urbana-Şampeyn İllinoys Universitetinin Elektrik və Kompüter Mühəndisliyi kafedrasının professoru Tamer Başar, Bakı Dövlət Universitetinin rektoru Elçin Babayev, Rusiya Elmlər Akademiyasının Şirşov adına Okeanologiya İnstitutunun elmi direktoru Robert Niqmatulin və İdarəetmə Sistemləri İnstitutunun (İSİ) baş direktoru, akademik Əli Abbasov çıxış edəcək.
Ətraflı məlumat əldə etmək üçün konfransın rəsmi veb səhifəsinə keçid edə bilərsiniz:
http://www.coia-conf.org/en/view/index/
Konfransın proqramı ilə tanış olmaq və onlayn şəkildə qoşulmaq üçün aşağıdakı linkə keçid edə bilərsiniz:
http://www.coia-conf.org/upload/editor/files/program_COIA22.pdf