“Horizon Avropa” Proqramı üzrə Milli Əlaqələndirici Şəxslər Şəbəkəsi yenilənib

24.08.2022 / Maraqlı məlumatlar

Avropa Komissiyasının çərçivə proqramlarının 2021-2027-ci illər üzrə növbəti mərhələsi “Horizon Avropa” (“Horizon Europe”) tədqiqat və innovasiya üzrə ən böyük proqramdır və büdcəsi 95.5 milyard avro təşkil edir. Sağlamlıq, mədəniyyət, kreativlik, inklüziv cəmiyyət, rəqəmsal, sənaye, kosmos, iqlim, enerji, mobillik, qida, bioiqtisadiyyat, milli resurslar, kənd təsərrüfatı, ətraf mühit və s. kimi sahələri əhatə edən bu proqramda Azərbaycan Şərq Tərəfdaşlığı ölkələri kimi iştirak edir.

Horizon proqramlarının imkanlarından istifadə etmək, çağırış haqqında məlumatı yerli təşkilatlar və mütəxəssislər arasında mütəmadi yaymaq, tərəfdaşların seçilməsi, layihələrin hazırlanması və təqdim edilməsinə dəstək göstərmək üçün Milli Əlaqələndirici Şəxslər Şəbəkəsi (MƏŞŞ) fəaliyyət göstərir. Digər ölkələrdə olduğu kimi, Azərbaycanda da bu MƏŞŞ Avropa Komissiyasının nümayəndələri ilə onlayn formatda keçirilən görüş və müzakirələr əsasında “Horizon Avropa” istiqamətləri üzrə yenilənib. MƏŞŞ koordinatoru AMEA-nın vitse-prezidenti, akademik İbrahim Quliyev, üzvlər olaraq müvafiq dövlət qurumları, elm, təhsil və səhiyyə müəssisələrinin mütəxəssisləri və əlaqələndirici kimi AMEA Rəyasət Heyəti aparatının Beynəlxalq elmi əməkdaşlıq şöbəsi müəyyənləşdirilib.

“Horizon Avropa” portalında Azərbaycanın Milli Əlaqələndirici Şəxslər Şəbəkəsi haqqında məlumat, şəbəkə üzvlərinin əlaqə vasitələri yerləşdirilib.

MƏŞŞ üzvləri haqqında məlumatı, həmçinin buradan əldə edə bilərsiniz.

Qeyd edək ki, son illər MƏŞŞ üzvlərinin fəaliyyəti nəticəsində Azərbaycanın alim və mütəxəssislərinin “Horizon” proqramlarında iştirak fəallığı artıb, bu göstərici xüsusilə Mari Sklodovska-Küri və COST proqramları üzrə nəzərəçarpandır.
science.gov.az