Akademik Arif Həşimov: “Fizika İnstitutunda quraşdırılmış Milli Grid Seqmenti dünya elminə inteqrasiyanın sürətləndirilməsinə xidmət edir”

28.09.2022 / Mühüm xəbərlər

Azərbaycanın elm və təhsil sahələrinin Avropaya inteqrasiya olunmasında Avropa Milli Tədqiqat və Təhsil Şəbəkəsi GEANT (Gigabit Avropa Akademik Şəbəkəsi) xüsusi rol oynayır. Bu şəbəkə tərəfindən koordinasiya olunan və Avropa İttifaqı tərəfindən maliyyələşdirilən EaPConnect (“Şərq Tərəfdaşlığı” layihəsi) aidiyyəti ölkələrdən olan tədqiqat və təhsil icmalarını bir araya gətirməyə və rəqəmsal sahədə qeyri-bərabərliyin azaldılmasına xidmət edir.

Bunu “5-ci Şərq Tərəfdaşlığı E-infrastrukturlar konfransı”nın açılışında AMEA-nın prezidenti v.i.e., akademik Arif Həşimov söyləyib. Alim bildirib ki, Azərbaycanın elm və təhsil sahələrinin Avropaya inteqrasiyasında Avropa Nüvə Tədqiqatları Mərkəzi - CERN ilə ölkəmizin müvafiq qurumları arasında inkişaf edən əməkdaşlıq əlaqələri mühüm rol oynayır. Bu əlaqələrin möhkəmlənməsində Fizika İnstitutunda quraşdırılmış Milli Grid Seqmentinin rolu böyük olub. Grid Mərkəzi ölkəmizin beynəlxalq elmi əlaqələrinin genişləndirilməsinə, dünya elminə inteqrasiyanın sürətləndirilməsinə, elmtutumlu mürəkkəb məsələlərin həllinə və CERN ilə birgə layihələrin həyata keçirilməsinə xidmət edir.

Akademik Arif Həşimov qeyd edib ki, Milli Grid Seqmentinin Avropa Nüvə Tədqiqatları Mərkəzi ilə inteqrasiyasını məhz Avropa Milli Tədqiqat və Təhsil Şəbəkəsi həyata keçirir.

“AMEA ilə Avropa Nüvə Tədqiqatları Mərkəzi arasındakı mövcud əməkdaşlıq əlaqələrinin inkişafında 1997-ci ildə Ulu Öndər Heydər Əliyev tərəfindən imzalanmış “Avropa Nüvə Tədqiqatları Mərkəzi ilə Yüksək Enerjilər Fizikası sahəsində elmi və texniki əməkdaşlığın daha da inkişaf etdirilməsi haqqında Əməkdaşlıq Sazişinin təsdiq edilməsi” barədə Sərəncam xüsusi olaraq vurğulanmalıdır. Bundan bir müddət sonra Azərbaycanının Milli Nüvə Tədqiqatları Mərkəzi ilə CERN arasında da əməkdaşlıq üzrə Anlaşma Memorandumu imzalanıb”, - deyə AMEA rəhbəri bildirib.
science.gov.az