İdarəetmə Sistemləri İnstitutunun əməkdaşı beynəlxalq konfransda çıxış edib

29.11.2022 / Mühüm xəbərlər

AR Elm və Təhsil Nazirliyi İdarəetmə Sistemləri İnstitutunun (İSİ) Süni intellekt metodlarının tətbiqi ilə tanınma məsələlərinin tədqiqi laboratoriyasının aparıcı elmi işçisi professor Şahnaz Şahbazova 12-14 oktyabr 2022-ci il tarixində Polşanın Varşava şəhərində keçirilən IWIFSGN-2022 “İntuisionistik Qeyri-Səlis Çoxluqlar və Ümumiləşdirilmiş Şəbəkələr” iyirminci beynəlxalq konfransına dəvət olunmuşdur.

Ş.Şahbazova konfransda “Lütfi Zadənin həyatı və elmi irsi. Onun ölümündən sonrakı 5 illik elmi fəaliyyətimiz” mövzusunda çıxış etmişdir.

Məqalədə professor Lotfi A. Zadənin həyatı və elmi irsi təsvir edilmişdir. Məruzədə  Zadənin Bakıda doğulduğu andan 10 yaşına qədər yaşadığı dövrdən başlayaraq, onun  məqalələri və elmi işlərinin  ilkin nəticələri, eləcə də elmi kəşfləri (nəzəriyyənin necə doğulduğu, bu nəzəriyyənin tarixi və xüsusiyyətləri) təsvir edilmişdir.

Digər alimlərlə (müəllimi Norbert Viner, Rudolf Kalman, Charles A. Desoer və başqaları) əməkdaşlığı və  həyatın son mərhələsinə qədər olan elmi fəaliyyəti  məqalədə ətraflı təsvir edilmişdir.

Bu məqalədə həmçinin Lütfi Ə. Zadənin ölümündən sonrakı 5 il ərzində onun davamçılarının  elmi fəaliyyəti haqında məlumatlar verilir.