AMEA-nın müxbir üzvü, professor Ağası Məlikovun biblioqrafik göstəricisi çap olunub

27.12.2022 / Mühüm xəbərlər

Azərbaycan Milli Elmlər Akademiyasının (AMEA) Mərkəzi Elmi Kitabxanası (MEK) tərəfindən AMEA-nın müxbir üzvü, İdarəetmə Sistemləri İnstitutunun laboratoriya müdiri, texnika elmləri doktoru, professor Ağası Məlikovun biblioqrafik göstəricisi çap olunub. Göstərici alimin həyatını, elmi-pedaqoji və ictimai fəaliyyətini, 1982-2022-ci illəri əhatə edən elmi əsərlərini və onun haqqında yazılmış mənbələri əks etdirir.

Biblioqrafiyaya alimin nəşr etdirdiyi kitabları, elmi məqalələri, respublikada və xarici ölkələrdə keçirilən konfranslardakı məruzələrinin tezisləri, rəhbəri və icraçısı olduğu layihələr, habelə, redaktə etdiyi əsərlər, rəhbərlik və ya opponentlik etdiyi namizədlik və doktorluq dissertasiyaları haqqında olan mənbələr daxil edilib. Həmçinin alimin həyatının əsas tarixləri göstərilib, ictimai və elmi-pedaqoji fəaliyyəti haqqında qısa oçerk, görkəmli elm xadimlərinin alim haqqında yazıları öz əksini tapıb.

Göstəriciyə daxil olan materiallar bölmələr üzrə xronoloji ardıcıllıqla, əlifba sırası ilə verilib.

Biblioqrafik göstəricidən istifadəni asanlaşdırmaq üçün kitabın sonunda alimin əsərlərinin və müştərək müəlliflərin əlifba göstəricisi verilib.

“Elm” nəşriyyatında çap olunan göstəricinin elmi redaktoru fəlsəfə elmləri doktoru, professor Məmməd Əliyev, redaktoru Əməkdar mədəniyyət işçisi Xuraman İsmayılova, tərtibçisi Rəna Cavadovadır.

Biblioqrafik göstərici kibernetika və tətbiqi riyaziyyat sahələrində çalışan alim və mütəxəssislər, ali məktəb müəllimləri və tələbələri, eləcə də geniş oxucu kütləsi üçün nəzərdə tutulub.