İdarəetmə Sistemləri İnstitutunun əməkdaşları “Sabahın alimləri” XII respublika müsabiqəsi çərçivəsində keçirilən sərgidə iştirak ediblər

16.02.2023 / Mühüm xəbərlər

14 fevral 2023-cü il tarixində Elm və Təhsil Nazirliyi, Təhsil İnstitutu, Gənclər və İdman Nazirliyi, Heydər Əliyev Mərkəzi, Azərbaycan Həmkarlar İttifaqları Konfederasiyası, Azərbaycan Milli Elmlər Akademiyası və BP şirkətinin təşkilatçılığı ilə “Sabahın alimləri” XII respublika müsabiqəsi öz işini sərgi ilə davam etdirib. Hər il keçirilən bu müsabiqədə Azərbaycan Respublikasında fəaliyyət göstərən ümumi təhsil müəssisələrinin IX-XI siniflərində təhsil alan şagirdlər komandalar şəklində hazırladıqları layihələri təqdim edir, öz yaradıcılıq bacarıqlarını nümayiş etdirirlər.

Şagirdlərin elmi axtarışlara sövq edilməsi, onların tədqiqatçı-mütəxəssis kimi formalaşmasına ölkənin bir çox elmi müəssisələri, o cümlədən AR Elm və Təhsil Nazirliyi İdarəetmə Sistemləri İnstitutu (İSİ) mütəmadi olaraq dəstək göstərir. İnstitutun tanınmış alimləri sözügedən müsabiqəyə qatılan şagirdlərə elmi məsləhətçilik edərək mövzu seçimi, layihələrin hazırlanması və müsabiqəyə təqdim olunmasına rəhbərlik edir. 189-190 saylı tam orta məktəbin 10-cu sinif şagirdləri Ziya Sadıqzadə və Əziz Əlizadədən ibarət komandasına İSİ-nin laboratoriya müdiri, t.e.d. Fəhrad Paşayev və baş elmi işçi, t.e.d. Elxan Səbziyev elmi dəstək göstəriblər.

Z.Sadıqzadə və Ə.Əlizadənin “Kompüter elmləri” nominasiyası üzrə müsabiqəyə təqdim etdikləri “Pilotsuz uçuş aparatının modem vasitəsilə ötürülən GPS məlumatları əsasında onun uçuş trayektoriyasının ekran təsvrinin qurulması” layihəsinin əsas məqsədi GPS-lə təchiz olunmuş obyektlərin, o cümlədən pilotsuz uçuş aparatlarının hərəkət trayektoriyasını tədqiq etmək üçün həmin trayektoriyanın kompüter monitorunda əyaniləşdirilməsidir. Layihənin yerinə yertirilməsi zamanı heksokopter tipli pilotsuz uçuş aparatının bortunda yerləşdirilmiş GPS qurğusundan alınan və modem vasitəsilə kompüterə ötürülən məlumatların emalı həyata keçirilir. Məlumatların emalı və nəticələrin əyaniləşdirilməsi zamanı həll üsulları və qrafik proqramlaşdırma metodları istifadə olunur. Əldə olunan nəticələr GPS-lə təchiz olunan obyektlərin ötürülən məlumatları əsasında onların cari yerini, hərəkət trayektoriyasını müəyyən etməyə, hərəkətin onlara tapşırılmış marşruta uyğunluğunu qiymətləndirməyə imkan verə bilər.

Üç gün davam edən müsabiqədə İSİ-nin baş direktoru, akademik Əli Abbasov, icraçı direktoru, AMEA-nın müxbir üzvü Əminağa Sadıqov, t.e.d. Fəhrad Paşayev, t.e.d. Elxan Səbziyev, institutun İctimaiyyətlə əlaqələr şöbəsinin müdiri, i.ü.f.d. Aygün Əliyeva, Təhsil şöbəsinin müdiri, r.ü.f.d Sevinc Quliyeva, Gənc Alim və Mütəxəssislər Şurasının Sədri Lamiyə Nəcəfova, elmi işçilər Nigar Əhmədli, Nərmin Abbaszadə, Pünar Quliyeva, Elmar Mustafayev və sairə əməkdaşlar iştirak ediblər.