“Avropa Birliyi Şərqi Tərəfdaşlıq Ölkələri ilə Tədqiqat və İnnovasiya əməkdaşlığı” layihəsi çərçivəsində görüş keçirilmişdir

22.02.2023 / Xarici əlaqələr və Əməkdaşlıq

21 fevral 2023-cü ildə AR Elm və Təhsil Nazirliyinin İdarəetmə Sistemləri İnstitutunda (İSİ) Avropa Komissiyasının “Avropa Birliyi Şərqi Tərəfdaşlıq Ölkələri ilə Tədqiqat və İnnovasiya əməkdaşlığı” layihəsi çərçivəsində layihənin nümayəndələri görüş keçirmişdir. Görüşdə Avstriyanın Sosial İnnovasiya Mərkəzinin layihə meneceri Martin Felix Gajdusek, İspaniya GAC qrup təşkilatının nümayəndəsi İnna Petrenko və İSİ-nin Beynəlxalq əlaqələr və innovasiya şöbəsinin müdiri, t.ü.f.d. Tofiq Babayev iştirak etmişlər.

Görüş çərçivəsində Şərqi Tərəfdaşlıq Ölkələrində milli elmi-tədqiqat proqramlarının reforması, yaşıl və rəqəmsal texnologiyaların transferlərinin dəstəklənməsinə yönəlmiş milli plan və proqramlar, Şərqi Tərəfdaşlıq Ölkələri üçün Avropa Komissiyası və ekspert qruplarının tövsiyələrinin yerinə yetirilməsi və Azərbaycanda rəqəmsal xarici investisiyalar barədə müzakirələr aparılmışdır. T.Babayev Azərbaycanda rəqəmsal iqtisadiyyatın vəziyyəti,  elektron bacarıq sahəsində kadr hazırlığı və digər məsələlərlə bağlı  qonaqlara məlumat vermiş, mövzu ətrafında fikir mübadiləsi aparılmış, suallar cavablandırılmışdır.

Qeyd edək ki, GAC qrupunun sözügedən layihəni həyata keçirən konsorsiumun rəhbəri kimi əsas məqsədi Azərbaycanda elmi-tədqiqat və innovasiya sahəsində əldə olunan nəticələrlə tanış olmaqdır.  

Görüşdə, həmçinin GAC qrupla gələcək əməkdaşlıq imkanları, İSİ ilə Avropa Komissiyasının layihələrində aktiv iştirak barədə fikir mübadiləsi aparılmışdır.