Azərbaycan elminin ağsaqqalının bir əsrlik yubileyi

15.12.2015 / Xəbərlər

Bu il dekabr ayında görkəmli azərbaycanlı alimi, Azərbaycan Milli elmlər akademiyasının həqiqi üzvü, Azərbaycanda kibernetika,informatika və idarəetmə elminin yaradılmasının əsasını qoymuş İbrahimov İsmayıl Əli oğlunun 100 yaşı  tamam olur.

İsmail müəllimin rəhbərliyi altında uzun illər neft sahəsində SSRİ və xarici ölkə kadrların hazırlığını yerinə yetirən Azərbaycan Neft və Kimya İnstitutu AZİ məşhur bir elm və təhsil ocağı olmuşdur. Son 30 ildən artıq dövrdə Kibernetika İnstitunda fəaliyyət göstərən alim elmin bu sahəsinin inkişafına böyük töhvələr vermişdir. Öz əməyinə görə İsmayıl müəllim keçmiş SSRİ-nin ən böyük ali mükafatlarına -Sosialist Əməyi Qəhramanı və SSRİ Dövlət mükafatına layiq görülmüş, tədris sahəsində çalışan ilk və yeganə Azərbaycan alimidir.

İbrahimovun Azərbaycan Nazirlər Soveti sədrinin birinci müavini kimi və elm sahəsindəki fəaliyyəti nəinki alimlərimiz, həm də bütün Azərbaycan xalqı üçün bir nümunədir.

Respublika prezentinin qərarı ilə İsmayıl İbrahimovun "Şərəf” ordeni ilə təltif edilməsi bizdə böyük qürur hissi doğurur.

Yubilyar bu gün də elmi fəaliyyətini davam etdirir. O İdarəetmə Sistemləri və İnformatika üzrə Problem şurasına rəhbərlik edir.

Dekabrın 15-də İdarəetmə Sistemləri İnstitutunun direktoru akademik Telman Əliyev başda olmaqla institutun bir qrup əməkdaşı İ.İbrahimovun qonağı olmuş və qarşıdan gələn yubileyi münasibətilə onu səmimi təbrik edib öz ürək sözlərini ona çatdırmışlar. Söhbət zamanı həmçinin yeni ildə İsmayıl müəllimin rəhbəri olduğu İdarəetmə Sistemləri və İnformatika üzrə Problem şurasının qarşısında duran məsələlər müzakirə olunmuşdur.