AMEA-da doktoranturaya sənəd qəbulunun elektronlaşdırılması mövzusunda tədbir keçirilib
04.04.2023 / Maraqlı məlumatlar
Aprelin 4-də AMEA-ın elmi müəssisə və təşkilatlarında təhsilə məsul şəxslərə doktoranturaya sənəd qəbulunun elektronlaşdırılması ilə əlaqədar “Təhsil Mərkəzləşdirilmiş İnformasiya Sistemi”nin (TMİS) “Ali və orta ixtisas təhsili alt sistemi” (AOİTAS) vasitəsi ilə qeydiyyatın həyata keçirilməsi mövzusunda təlim keçirilib.
Tədbirdə AMEA-nın Rəyasət Heyəti aparatının Elm və təhsil şöbəsinin müdiri, texnika elmləri üzrə fəlsəfə doktoru, dosent Hüseyn Hüseynov, şöbənin müdir müavini, fəlsəfə üzrə fəlsəfə doktoru Vüsal Zülfüqarov, şöbənin məsul şəxsləri, Elm və Təhsil Nazirliyinin Təhsil Sisteminin İnformasiyalaşdırılması İdarəsinin əməkdaşları Nicat Etibaroğlu və Elvin Axundov, həmçinin AMEA-nın elmi müəssisələrinin Təhsil şöbələrinin müdirləri və təhsilə məsul şəxslər iştirak ediblər.
Tədbirdə çıxış edən Hüseyn Hüseynov təlim haqqında ümumi məlumat verərək AMEA prezidentinin tövsiyə və tapşırıqlarını tədbir iştirakçılarının diqqətinə çatdırıb.
Daha sonra Elm və Təhsil Nazirliyinin Təhsil Sisteminin İnformasiyalaşdırılması İdarəsinin əməkdaşı Nicat Etibaroğlu doktoranturaya sənəd qəbulu ilə bağlı müraciətlərə baxılması, müvafiq qərarın verilməsi, müraciətçilərə müəssisənin qərarı barədə elektron bildirişlərin göndərilməsi, sistemə əlavə edilmiş qəbul planının işlənilməsi, təhsil haqqı ödənişlərinin həyata keçirilməsi prosesini izah edib. Bildirib ki, sözügedən xidmət sayəsində TMİS-ə qoşulmuş elmi müəssisələrə doktorantura pilləsi üzrə qəbul olmaq istəyən şəxslər Elm və Təhsil Nazirliyinin “Şəxsi kabineti” vasitəsilə elektron formada müraciət edə və müraciət üzrə cari və növbəti addımları izləyə biləcəklər. Müraciətlərinə elmi müəssisə tərəfindən müsbət rəy verilən şəxslər xarici dil imtahanlarında iştirak edə biləcəklər.
Onun sözlərinə görə, müraciətlərin elektron formada təşkil edilməsi qəbul prosesinin daha çevik, rahat və keyfiyyətli təşkilinə şərait yaradacaq. Tələbələr müraciətin irəliləyişi, imtahan nəticələri və digər yeniliklər barədə vaxt itirmədən və olduğu yeri tərk etmədən öz “Şəxsi kabinet”ləri vasitəsilə məlumat əldə edə biləcəklər. Bununla yanaşı, qeydiyyatın AOİTAS vasitəsi ilə aparılması məlumatların vahid elektron bazada toplanılmasına, digər xidmətlərlə qarşılıqlı inteqrasiyasına, geniş təhlil və hesabatların real vaxt rejimində avtomatik hazırlanmasına şərait yaradacaq.
Sonda tədbir iştirakçıları suallar və təkliflərlə çıxış ediblər.
