İdarəetmə Sistemləri İnstitutunda Çin Elmlər Akademiyasının Aerokosmik İnformasiya Tədqiqat İnstitutunun idarə heyəti ilə görüş keçirilib
31.05.2023 / Xarici əlaqələr və ƏməkdaşlıqAzərbaycan Respublikası Elm və Təhsil Nazirliyi İdarəetmə Sistemləri İnstitutunda (İSİ) Çin Elmlər Akademiyasının Aerokosmik İnformasiya Tədqiqat İnstitutunun idarə heyəti ilə görüş keçirilib.
Görüşdə İSİ-nin baş direktoru, akademik Əli Abbasov, icraçı direktoru, AMEA-nın müxbir üzvü Əminağa Sadıqov, Beynəlxalq əlaqələr və innovasiya şöbəsinin müdiri, t.ü.f.d. Tofiq Babayev, İctimaiyyətlə əlaqələr şöbəsinin müdiri, i.ü.f.d. Aygün Əliyeva, Çin Elmlər Akademiyasının Aerokosmik İnformasiya Tədqiqat İnstitutunun Uzaqdan Zondlama Komitəsinin direktoru, XingFa Gu, icraçı direktoru, professor Liu Yongxue və əməkdaşları iştirak ediblər.
Əvvəlcə akademik Ə.Abbasov qonaqlara instituta göstərilən diqqətə görə təşəkkürünü bildirərək rəhbərlik etdiyi elmi müəssisənin tarixi, İdarəetmənin nəzəri və tətbiqi problemləri, Süni intellekt texnologiyaları və Sosial-iqtisadi sistemlərin tədqiqi kimi əsas fəaliyyət istiqamətləri, aparılan fundamental elmi tədqiqatlar, əldə olunan mühüm elmi nəticələr barədə məlumat verib.
“Bir kəmər, bir yol” və “Rəqəmsal İpək Yolu” konsepsiyalarından bəhs edən Ə.Abbasov regionda rəqəmsallaşmanın önəminə toxunub, sözügedən elmi müəssisələr arasında ikitərəfli səmərəli əlaqələrin inkişafı istiqamətində təkliflərini səsləndirib.
Sonra Çin Elmlər Akademiyasının Aerokosmik İnformasiya Tədqiqat İnstitutunun Uzaqdan Zondlama Komitəsinin drektoru XingFa Gu çıxış edərək rəhbərlik etdiyi müəssisənin fəaliyyət istiqamətləri və potensial elmi tədqiqatlar barədə məlumat verib. İSİ ilə qurulacaq səmərəli əməkdaşlıq əlaqələrindən bəhs edən alim uzaqdan zondalama proqramının Azərbaycanda istifadəsi, aerokosmik sahədə informasiyaların əldə olunması, emalı və istifadəsi, bu istiqamətdə birgə elmi tədqiqatların aparılması barədə təkliflərini səsləndirib.
Kosmosdan Yer haqqında lazımi informasiyanın alınması ilə bağlı həyata keçirilən aerokosmik tədqiqatlardan bəhs edən XingFa Gu Çin Xalq Respublikası ilə əməkdaşlığın Azərbyacanda da bu sahənin inkişafına təkan verəcəyinə əminliyini ifadə edib. O, İdarəetmə Sistemləri İnstitutu kimi qabaqcıl elmi-tədqiqat müəssisəsi ilə əməkdaşlıq etməkdən məmnun olduğunu bildirərək ikitərəfli əlaqələrin inkişafı məqsədilə akademik Əli Abbasovu Çin Xalq Respublikasına dəvət edib.
Sonda sözügedən müəssisələr arasında birgə elmi tədqiqatların həyata keçirilməsi barədə gələcək perspektivlər müzakirə olunub.