İdarəetmə Sistemləri İnstitutunun icraçı direktoru, AMEA-nın müxbir üzvü Əminağa Sadıqov 16 iyun 2023-cü il tarixində UNEC-də keçirilən “Universitet-Dövlət-Sənaye əlaqələrində kommunikasiya problemi: Kim nə istəyir” mövzusunda tədqiqat layihəsinin nəticələrinin təqdimatına həsr olunmuş tədbirdə iştirak edib.

 

 

UNEC-in rektoru professor Ədalət Muradov, UNEC-in daxili vəsaiti hesabına ilk dəfə olaraq keçirilmiş qrant müsabiqəsinin qalibi olmuş layihənin mövzusunun aktuallığından bəhs edərək layihəni icra edən UNEC Empirik Tədqiqatlar Mərkəzinin və Bilik İqtisadiyyatı UNEC Tədqiqat Mərkəzinin tədqiqatçılarına təşəkkürünü bildirib. Rektor tədqiqatın nəticələrinin çap olunduğu kitabın universitetlərə, ölkəmizin bütün elmi tədqiqat və ali təhsil müəssisələrinə, həmçinin müvafiq özəl sektor nümayəndələrinə təqdim ediləcəyini qeyd edib.

 

 

Tədbirdə layihənin hazırlanmasında əsas ekspertlərdən biri kimi iştirak edən AMEA-nın müxbir üzvü Əminağa Sadıqov çıxış edərək layihənin tədqiqat mövzusunun aktuallığını və belə tədqiqatlara qrantların ayrılmasının vacibliyini bildirib. O, özəl sektorun, sənaye müəssisələrinin, həmçinin bir sıra nazirliklərin innovativ elmi-texnoloji layihələrin reallaşdırılmasna, elmi və mühəndis kadrların hazırlanmasına biganəliyini xüsusi vurğulayaraq elmin və təhsilin inkişafına investisiya qoymadıqlarını bildirib. Alim bunun da öz növbəsində ölkəmizdə elmtutumlu və rəqabətqabiliyyətli məhsulların istehsalına mənfi təsir göstərdiyini qeyd edib.

 

 

Tədbirdə layihənin nəticələri ilə bağlı geniş müzakirələr aparılıb, təkliflər irəli sürülüb və suallar cavablandırılıb.