Kibernetika İnstitutu tərəfindən anomal seysmik proseslərin Robust Noise Monitoring telemetrik stansiyası quraşdırılmışdır

08.12.2011 / Xəbərlər

Kibernetika İnstitutu tərəfindən, 1 may 2010-cu ildə Xəzər dənizinin Qum adasında, 3500 m dərinlikli neft quyusu üzərində və 20 oktyabr 2011-ci ildə Şirvan OİL şirkətinin 5000 m dərinlikli 427 saylı quyusu üzərində anomal seysmik proseslərin qeyd edilməsi üçün iki Robust Noise Monitoring telemetrik stansiyası quraşdırılmışdır. Hazırda Siyəzənneft və Naftalanda 3-cü və 4-cü stansiyalar quraşdırılır. Qum adasında və Şirvanda aparılan eksperimentlər göstərir ki, zəlzələləri yaradan anomal seysmik prosesləri standart seysmostansiyalardan 15-20 saat əvvəl qeyd etmək mümkündür.
Kibernetika İnstitutunun müraciətinə əsasən, 8 dekabr 2011-ci il tarixində, Rabitə və İnformasiya Texnologiyaları Nazirliyinin bir qrup mütəxəssisi Kibernetika İnstitutunda olmuşlar. Onların gəlişinin məqsədi, anomal seysmik proseslərin başlanması anının telemetrik stansiyalarda qeydə alınması və eksperimental informasiyanın serverə ötürülməsi sahəsində aparılan işlərlə yaxından tanış olmaq idi.