İdarəetmə Sistemləri İnstitutunun icraçı direktorunun elmi monoqrafiyası LAMBERT Akademik Nəşriyyatı tərəfindən çap olunub
29.07.2023 / Mühüm xəbərlərAzərbaycan Respublikası Elm və Təhsil Nazirliyi İdarəetmə Sistemləri İnstitutunun icraçı direktoru, AMEA-nın müxbir üzvü, professor Əminağa Sadıqovun “Çevik və təşkilati idarəetmənin riyazi məsələləri” elmi monoqrafiyası Almaniyanın tanınmış LAMBERT Akademik Nəşriyyatı tərəfindən nəşr olunmuşdur.
300 səhifədən ibarət olan monoqrafiyada çevik və təşkilati idarəetmənin təkmilləşdirilməsinə yönəlmiş yeni riyazi modellər, metodlar və vasitələr tədqiq edilmiş və onların tətbiqi imkanları araşdırılmışdır.
Monoqrafiyada çevik və təşkilati idarəetmə sistemlərində istifadə olunan optimallaşdırma metodları sistemli təqdim olunur. Bu metodlar dəyişən plan prinsipi, yəni cari informsaiyanın dövri olaraq dəqiqləşdirilməsi ilə optimal idarəetmənin proqnozlaşdırılmasına əsaslanır.
Əsas diqqət dinamik proqramlaşdırma metoduna, onun modifikasiyasına, ölçülərin kiçilməsinin metod və üsullarına yetirilmişdir. Hesablama çətinliklərini azaltmaq, metodları bir-biri ilə müqayisə etmək və bütün hesablama resurslarından maksimum istifadə etmək üçün mürəkkəblik prinsipindən istifadə olunur.
Monoqrafiya əsasən müvafiq profilli alim və mütəxəssislər, həmçinin idarəetmənin təşkili və operativ həll tələb edən vəzifələrin yerinə yetirilməsi, o cümlədən fövqəladə hallarda obyektlərin və əhalinin mühafizəsi sahəsində çalışan dövlət orqanlarının əməkdaşları üçün nəzərdə tutulmuşdur.
Monoqrafiyada yer alan nəticələr müvafiq profilli ali təhsil müəssisələrinin elmi tədqiqatlarında və tədris proqramlarında istifadə oluna bilər.
Monoqrafiyanı aşağıdakı keçiddən almaq olar:
https://www.morebooks.shop/sho.../shop/product/9786206752813