AMEA-nın müxbir üzvü Ağası Məlikov beynəlxalq konfransda plenar məruzə ilə çıxış edib
29.09.2023 / Mühüm xəbərlərAR Elm və Təhsil Nazirliyi İdarəetmə Sistemləri İnstitutunun (İSİ) Kütləvi xidmət və ehtiyatların idarə edilməsi sistemlərinin modelləşdirilməsi laboratoriyasının müdiri, AMEA-nın müxbir üzvü, professor Ağası Məlikov 25-29 sentyabr 2023-cü il tarixlərində Moskva şəhərində keçirilən “Paylanmış Kompüter və Rabitə Şəbəkələri: İdarəetmə, Hesablama, Rabitə” (The 26th International Conference on Distributed Computer and Communication Networks: Control, Computation, Communications (DCCN’2023) adlı 26-cı beynəlxalq elmi konfransda iştirak edib.
Hibrid formatda keçirilən konfransda A.Məlikov “Əsas ehtiyatlanma qaydasından istifadə edildikdə fəlakətləri nəzərə almaqla xidmət-ehtiyatlanma sistemlərinin ədədi tədqiqi” (Numerical Study of Queuing-Inventory Systems with Catastrophes under Base Stock Policy) adlı plenar məruzə ilə çıxış edib. Məruzədə sonsuz növbəli və tək serverli Markov tipli xidmət-ehtiyatlanma sistemləri öyrənilmişdir. Ehtiyatların artırılması zamanı təsadüfi kəmiyyətdir və sistemdə müsbət sorğulardan başqa neqativ sorğular da vardır. Belə sistemlərin erqodiklik şərti müəyyən edilmiş və onların əsas xarakteristikalarını hesablamaq üçün dəqiq düsturlar tapılmışdır. İşdə yaradılmış alqoritmlər əsasında aparılmış ədədi eksperimentlərin nəticələri verilmiş və analiz edilmişdir. Məruzə konfrans iştirakçılarının marağına səbəb olmuş, mövzu ətrafında müxtəlif suallar cavablandırılmışdır.
Qeyd edək ki, sözügedən məruzə Springer Nəşriyyatının Computer and Communications in Information Sciences toplusunda çap ediləcikdir. Məqalənin həmmüəllifləri İSİ-nin kiçik elmi işçisi Ləman Poladova və APJ Abdul Kalam Texnoloji Universiteti Jyothi Mühəndislik Kollecinin əməkdaşı Edayapurath Sandhyadır.
Beynəlxalq konfransın əsas məqsədi elmi tədqiqat müəssisələri, dövlət və özəl sektorlardan olan nümayəndələri bir araya gətirərək paylanmış kompüter və kommunikasiya şəbəkələrinin nəzəriyyəsi və tətbiqləri, riyazi modelləşdirmə, paylanmış sistemlərin idarə edilməsi və optimallaşdırılması üsulları sahələrində mövcud elmi və praktiki problemlərin müzakirə edilməsi olmuşdur.
Ətraflı məlumat üçün aşağıdakı linkə keçid edə bilərsiniz: