OpenAI şirkəti fərdi süni zəka çiplərini hazırlamağı nəzərdən keçirir
12.10.2023 / Maraqlı məlumatlar
Süni zəka əsaslı ChatGPT çat-botunun yaradıcısı olan OpenAI şirkəti özünün süni zəka çiplərini hazırlamağı nəzərdən keçirir. Bunun sayəsində şirkət bazarda süni zəka prosessorlarının hazırlanması ilə məşğul olan istehsalçılardan asılılığını aradan qaldırmaq istəyir. Bu cür istehsalçılar siyahısına həmçinin NIVIDA şirkəti də daxildir. Bundan əlavə olaraq OpenAI bu üsul ilə özünü lazımi sayda süni zəka çipləri ilə təmin etmək istəyir. Reuters saytının verdiyi məlumata əsasən keçən il OpenAI şirkətində heç də ucuz qiymətə satılmayan süni zəka çiplərinin çatışmazlığı probleminin aradan qaldırılması üzrə müxtəlif müzakirələr aparılıb. Buna görə də şirkət fərdi süni zəka çipini hazırlamaq, NVIDIA kimi istehsalçılar ilə daha sıx əməkdaşlıq etmək və süni zəka prosessorlarının istehsalçılarının diversifikasiyası kimi variantları nəzərdən keçirir.
OpenAI şirkətinin CEO-su Sam Altman çoxlu sayda süni zəka prosessorunun əldə edilməsini şirkətin əsas prioritetlərindən biri hesab edir. O, iki problemə istiqamətlənib. OpenAI şirkətinin proqram təminatlarının çalışmalarını təmin edən aparıcı süni zəka prosessorlarının çatışmazlığı və şirkət məhsullarının çalışmalarından cavabdeh olan hardware təminatının xidməti üçün sərf edilən inanılmaz vəsaitlər. OpenAI özünün generativ süni zəka texnologiyasını Microsoft tərəfindən hazırlanmış superkompüterdə hazırlayır. Sözügedən superkompüter özündə NVIDIA-nın 10 000 ədəd qrafik prosessorunu birləşdirir. Analitiklərin hesablamalarına əsasən bir istifadəçinin ChatGPT-yə göndərdiyi bir sorğu OpenAI şirkətinə 0.04$-a başa gəlir.
Əgər sorğuların sayı Google Search-ə göndərilən sorğuların sayının 1/10 hissəsini təşkil etsə, çat-botun çalışması üçün ümumi dəyəri 48.1 milyard dollar təşkil edəcək süni zəka çipinə ehtiyac duyulacaq. OpenAI şirkətinin dəqiq şəkildə öz süni zəka çipini hazırlayıb-hazırlamayacağı bilinmir. Bu cür layihə hər il yüz milyonlarla dollar vəsait tələb edə bilər. Hətta bu cür vəsaitin sərf ediləcəyi halda müsbət nəticələrin əldə ediləcəyinə zəmanət verilmir. Bu prosesi süni zəka çiplərinin istehsalı ilə məşğul olan hansısa şirkətin alınması vasitəsilə sürətləndirmək olar. Məlumata əsasən OpenAI hətta bu cür variantı da nəzərdən keçirib.
