İdarəetmə Sistemləri İnstitutunun Elmi Şurasının növbəti iclası keçirilib
11.10.2023 / Mühüm xəbərlər
11 oktyabr 2023-cü il tarixində AR Elm və Təhsil Nazirliyi İdarəetmə Sistemləri İnstitutunda (İSİ) Elmi Şuranın növbəti iclası keçirilib. Tədbirdə institutun rəhbərliyi, şura üzvləri, şöbə və laboratoriya müdirləri tam heyətdə iştirak ediblər.
İclası Elmi şuranın sədri, akademik Əli Abbasov açaraq gündəlikdə yer alan məsələləri tədbir iştirakçılarının diqqətinə çatdırıb. Akademik AR Elm və təhsil naziri Emin Əmrullayevin müvafiq əmri ilə Elm və Ali Təhsil üzrə Dövlət Agentliyinin İdarə Heyətinə yeni təyinat barədə tədbir iştirakçılarına məlumat verib. Ə.Abbasov t.e.d. Ülkər Səttarovanın Agentliyinin İdarə Heyətinin sədri vəzifəsinə təyin olunmasının ölkədə elm və təhsil sahələrinin inkişafına töhfə verəcəyinə əminliyini ifadə edib.
Ə.Abbasov, həmçinin gənclər üçün Prezident Mükafatına namizədlərin təqdim edilməsi haqqında məsələni tədbir iştirakçılarının diqqətinə çatdırıb, mövzu ətrafında müzakirələr aparılıb.
Sonra İSİ-nin icraçı direktoru, AMEA-nın müxbir üzvü Əminağa Sadıqov 2023-cü ildə İdarəetmə Sistemləri İnstitutunda aparılmış elmi tədqiqat işlərinin əsas nəticələri haqqında məsələ ətrafında məruzə edib. Alim cari ildə institutda aparılmış 6 elmi tədqiqat işi əsasında əldə edilmiş 7 mühüm elmi nəticəni ətraflı şəkildə şura iştirakçılarının diqqətinə çatdırıb. Mövzu ətrafında şura üzvləri tərəfindən geniş müzakirə aparılıb, müxtəlif suallar cavablandırılıb. Müzakirələr əsasında şura üzvləri tərəfindən məsələyə yenidən baxılması qərara alınıb.
Ə.Sadıqov, həmçinin 2023-cü ildə laboratoriyalarda aparılan elmi-tədqiqat işlərinin tələb olunan forma üzrə hesabatlarının təqdim edilməsi məsələsi haqqında məruzə edib. Məsələ ətrafında fikir mübadiləsi aparılıb, açıq səsvermə yolu ilə hesabatların cari ayın sonunadək təqdim olunması qərara alınıb.
Sonra 2024-cü il üzrə laboratoriyalarda aparılacaq elmi-tədqiqat işinin mərhələlərinin təqdim edilməsi haqqında məsələyə baxılıb, institut rəhbərliyi tərəfindən müvafiq tapşırıqlar səsləndirilib.
Gündəlikdən irəli gələn digər məsələ ətrafında məruzə edən İSİ-nin Təhsil şöbəsinin müdiri, r.ü.f.d. Sevinc Quliyeva 2023-cü ildə institutun fəlsəfə və elmlər doktoru hazırlığı üzrə doktoranturaya və dissertanturaya qəbulun nəticələrini şura üzvlərinə təqdim edib. Şura üzvləri tərəfindən dissertasiya mövzuları müzakirə olunub, səsvermə yolu ilə müvafiq qərarlar qəbul edilib.
Daha sonra bir sıra cari məsələlərə baxılıb.
