İdarəetmə Sistemləri İnstitutunda Belarus Dövlət İqtisad Universitetinin nümayəndəsi ilə görüş keçirilib
13.12.2023 / Xarici əlaqələr və Əməkdaşlıq13 dekabr 2023-cü il tarixində AR Elm və Təhsil Nazirliyi İdarəetmə Sistemləri İnstitutunda (İSİ) Belarus Dövlət İqtisad Universitetinin nümayəndəsi ilə görüş keçirilib. Görüşdə İSİ-nin baş direktoru, akademik Əli Abbasov, Beynəlxalq əlaqələr və innovasiya şöbəsinin müdiri, t.ü.f.d. Tofiq Babayev, İctimaiyyətlə əlaqələr şöbəsinin müdiri, i.ü.f.d. Aygün Əliyeva, Azərbaycan Dövlət İqtisad Universitetinin (UNEC) Elmi fəaliyyətin təşkili və idarə edilməsi departamentinin direktoru, prof. Zahid Fərrux Məmmədov və Belarus Dövlət İqtisad Universitetinin Tədris işləri üzrə prorektoru, dosent Olqa Morozeviç iştirak ediblər. Görüşün əsas məqsədi sözügedən müəssisələr arasında elm və təhsil sahələrində əməkdaşlıq əlaqələrinin qurulması və inkişaf etdirilməsi olub.
Əvvəlcə akademik Əli Abbasov instituta göstərilən diqqətə görə təşəkkürünü bildirərək rəhbərlik etdiyi elmi müəssisənin tarixi, strukturu, idarəetmənin nəzəri və tətbiqi problemləri, süni intellekt texnologiyaları və sosial-iqtisadi sistemlərin tədqiqi kimi əsas fəaliyyət istiqamətləri və aparılan fundamental elmi tədqiqatlar barədə ətraflı məlumat verib. İdarəetmə sistemləri, optimallaşdırma və modelləşdirmə sahələrində əldə olunan mühüm elmi nəticələrdən bəhs edən alim, alınan qrantlar, patentlər və həyata keçirilən layihələrdən danışıb.
Sonra dosent Olqa Morozeviç təmsil etdiyi elmi müəssisənin fəaliyyət istiqamətləri barədə məlumat verib, universitetdə təhsil alan azərbaycanlı tələbələrə yaradılan şəraitdən danışıb. O, Belarus Dövlət İqtisad Universitetində yeni yaradılan Süni İntellekt Mərkəzindən söz açıb, İSİ alimlərini elmi seminarlar keçirməyə üçün universitetə dəvət edib. O.Morozeviç sözügedən elmi müəssisələr arasında gələcək mübadilə proqramları ilə bağlı təkliflərini səsləndirib, ikitərəfli əməkdaşlığın inkişaf etdiriləcəyinə əminliyini ifadə edib.
Görüş çərçivəsində sözügedən elmi müəssisələr arasında birgə fəaliyyət imkanları və davamlı əməkdaşlıq perspektivləri müzakirə edilib.