İdarəetmə Sistemləri İnstitutunda “Azərbaycan iqtisadiyyatının rəqəmsal transformasiyasında süni intellektin rolu və inkişaf perspektivləri” mövzusunda "Ustad dərsi" keçirilib

25.12.2023 / Mühüm xəbərlər

22 dekabr 2023-cü il tarixində AR Elm və Təhsil Nazirliyi Sabah qruplarının Azərbaycan Texniki Universiteti üzrə bölməsinin təşəbbüsü və AR Elm və Təhsil Nazirliyi İdarəetmə Sistemləri İnstitutunun (İSİ) təşkilatçılığı ilə Azərbaycan Texniki Universiteti Sabah qruplarının “İnformasiya texnologiyaları mühəndisliyi” ixtisası üzrə təhsil alan tələbələrinə "Ustad dərsi" (MasterClass) keçirilib. "Ustad dərsi" İSİ-nin Qərarların qəbul edilməsini dəstəkləyən informasiya sistemləri laboratoriyanın müdiri, professor Ramin Rzayevin tərəfindən “Azərbaycan iqtisadiyyatının rəqəmsal transformasiyasında süni intellektin rolu və inkişaf perspektivləri” mövzusunda keçirilib.

Süni intellekt alətləri və texnikalarının biznesdə və qlobal iqtisadiyyatda aktual mövzulardan biri olduğunu qeyd edən R.Rzayev süni intellektin insanların həyat və iş tərzində köklü, bəlkə də görünməmiş dəyişikliklərə səbəb olacağını bildirib.

Süni intellektin gündəlik həyatımıza, insan fəaliyyətinin bütün sahələrinə fəal şəkildə nüfuz etdiyini vurğulayan alim onun müasir dövrün çağırışlarına müvafiq olaraq təhlükəsizliyi və artan məhsuldarlığı təmin etdiyini, bütövlükdə cəmiyyət üçün yeni transformasiya imkanları təklif etdiyini bildirib.

Yaxın gələcəkdə süni intellektin rəqəmsal iqtisadiyyatın mütərəqqi inkişafına mühüm töhfə verəcəyini qeyd edən R.Rzayev proseslərinin avtomatlaşdırılması texnologiyası, təbii dillərin emalı və digər kateqoriyalardan ətraflı şəkildə bəhs edib.

Qeyri-səlis məntiqin bir çox praktiki, o cümlədən intellektual problemlərin həllində rolu və vəzifələrindən bəhs edən R.Rzayev onun əsas müddəa və doktrinal imkanlarını nəzərdən keçirib.

Tələbələrlə fikir mübadiləsi şəklində keçirilən "Ustad dərsi" böyük marağa səbəb olub və mövzu ətrafında bir sıra suallar cavablandırılıb.