Kosmik hava durumu və proqnozu açıqlanıb
25.12.2023 / Maraqlı məlumatlar
Kosmik hava durumu – Hesabat dövrü ərzində Günəş orta səviyyəli fəallıq göstərmişdir. Maksimal sinifli alışma 3519 oblastında M3.33 sinifli alışma olmuşdur. Alışmalar nəticəsində radiosiqnalların ötürülməsində R1 dərəcəli fasilələr yaranmışdır. Həmçinin Yerə istiqamətlənmiş Tac Kütlə Atılmaları (TKA) qeydə alınmışdır. Günəşin səthində ləkələrin sayı azalaraq 8 ləkə qrupunda 113 ləkə müşahidə olunur.
Elm və Təhsil Nazirliyinin Şamaxı Astrofizika Rəsədxanasından verilən məlumata görə, enerjisi 2 MeV-dən çox olan elektron seli 1867 pfu-ya kimi yüksəlmişdir. 10 MeV-dən çox enerji yüklü proton seli isə fon səviyyəsində olmuşdur.
Hesabat dövründə Günəş küləyinin sürəti 835 km/san-dək yüksəlmişdir. Planetlərarası maqnit sahəsinin maksimal qiyməti Yer orbitində 13 nT, radial istiqamətdə isə -11 nT olmuşdur. Hal-hazırda Günəş küləyinin sürəti 435 km/san, planetlərarası maqnit sahəsinin maksimal qiyməti 6 nT, radial istiqamətdə isə 4 nT təşkil edir.
Hesabat dövrü ərzində 19-20 dekabrda geomaqnit sahəsinin G1 (zəif) səviyyəsinədək yüksəlməsi qeydə alınmışdır. Hal-hazırda Kp indeksi 1-ə bərabərdir və geomaqnit sahə sakitdir.
Kosmik hava proqnozu – Proqnoz günlərində (25-31 dekabr) C sinif alışmanın baş verməsi ehtimalı 95%, M (R1-R2) sinif alışmanın baş verməsi ehtimalı 35%, X (R3) sinif alışmanın baş verməsi ehtimalı isə 5% təşkil edir.
Enerjisi 2 MeV-dən çox olan elektron selinin normal və orta səviyyələrdə, 10 MeV-dən çox enerji yüklü proton selinin isə fon səviyyəsində olacağı proqnozlaşdırılır.
Günəş küləyi sürətinin 24 dekabrda baş vermiş TKA təsiri ilə artacağı gözlənilir.
Geomaqnit sahəsi – 24 dekabrda baş vermiş TKA təxminən 1900 km/san sürətə malikdir və 27 dekabrda Yerə çatacağı gözlənilir. Bu səbəbdən G1 (zəif) səviyyəli geomaqnit qasırğasının baş verməsi ehtimalı var. Sonra isə geomaqnit sahəsinin sakit olacağı proqnozlaşdırılır.
