Çində yaşayan həmvətənlərimiz Azərbaycan Respublikası Prezidenti seçkilərində fəal iştirak ediblər
19.02.2024 / Mühüm xəbərlərÇin Xalq Respublikasında yaşayan həmvətənlimiz, geologiya-mineralogiya elmləri üzrə elmləri doktoru, professor, akademik Elçin Xəlilov Çində yaşayan soydaşlarımızın 7 fevral 2024-cü il tarixində keçirilən Azərbaycan Respublikası Prezidenti seçkilərində iştirakı barədə “Vışka” («Вышка») qəzetinə müsahibə verib. Soydaşlarımızın seçkilərdə böyük ruh yüksəkliyi ilə iştirak edərək Azərbaycanın xoşbəxt və firavan gələcəyinə səs verdiklərini bildirən akademik müşahidə əsasında şəffaf şəkildə həyata keçirilən və yüksək səviyyədə təşkil olunan seçkilərin dünya demokratiyası üçün də bir örnək olduğunu vurğulayıb. Çindəki soydaşlarımızın iştirak etdikləri bu seçkilərdəki yekdillik və ruh yüksəkliyi hazırkı dövlət başçısına olan böyük etimadı və minnətdarlığı əks etdirirdi.
E.Xəlilov Azərbaycanın ÇXR-dəki səfirliyində olarkən ölkəmizin fövqəladə və səlahiyyətli səfiri Bünyad Hüseynovla görüşüb, ona Çindəki fəaliyyəti və sözügedən ölkələrin elmi ictimaiyyəti, elm və təhsil müəssisələri arasında əməkdaşlığın inkişafı istiqamətində atılan addımlardan söz açıb. Akademik, həmçinin 25-29 oktyabr 2023-cü il tarixlərində bilavasitə öz iştirakı ilə ÇXR Vençjou Universiteti və Rusiya Elmlər Akademiyasının Sankt-Peterburq Federal Tədqiqat Mərkəzinin həmtəşkilatçılığı ilə AR Elm və Təhsil Nazirliyi İdarəetmə Sistemləri İnstitutunda (İSİ) keçirilən İnteraktiv Kollaborativ Robototexnika üzrə 8-ci Beynəlxalq Konfransı (ICR 2023) haqqında ətraflı söz açıb.
Qeyd edək ki, E.Xəlilov “Bilik və bacarıqlarına ehtiyac duyulan istedadların cəlb edilməsi üzrə dövlət milli proqramı”nın qalibi kimi Çin Xalq Respublikasına dəvət olunub və 2022-ci ildən etibarən orada yaşayır. Akademik “Milli səviyyəli istedadlar müsabiqəsi”nin qalibi kimi “Milli Yüksək Səviyyəli İstedad” statusu alıb və Çin Xalq Respublikasının İstedadların Dövlət Reyestrinə daxil edilib. O, hazırda Vençjou Universitetində bir sıra elmi proqramlara və universitetin Böyük elmi şöbəsinə rəhbərlik edir.
Müsahibənin tam mətni ilə tanış olmaq üçün aşağıdakı linkə keçid edə bilərsiniz: