İdarəetmə Sistemləri İnstitutunda 8 mart - Beynəlxalq Qadınlar Günü münasibətilə tədbir keçirilib
07.03.2024 / Tədbirlər
AR Elm və Təhsil Nazirliyi İdarəetmə Sistemləri İnstitutunda (İSİ) 8 mart – Beynəlxalq Qadınlar Günü münasibətilə tədbir keçirilib. Tədbirdə institutun rəhbərliyi, şöbə və laboratoriya müdirləri, gənc alim və mütəxəssislər iştirak ediblər.
Tədbiri giriş nitqi ilə açan İSİ-nin baş direktoru, akademik Əli Abbasov Azərbaycan qadınının tarixin müxtəlif dövrlərində cəmiyyətdə tutduğu yüksək mövqedən bəhs edib. Bildirib ki, Azərbaycan Respublikasının Birinci vitse-prezidenti Mehriban xanım Əliyevanın rəhbərliyi ilə milli maraqlarımıza xidmət edən layihələrin uğurla icra olunması onun timsalında Azərbaycan xanımlarının zəngin mənəvi-intellektual və yüksək əxlaqi dəyərlərə malik olmasının bariz nümunəsidir. Qeyd edib ki, dünyanın bir sıra qabaqcıl ölkələrinin qadınlarından əvvəl müsəlman şərqində seçib-seçilmək hüququ qazanan Azərbaycan qadınları qabaqcıl düşüncəli, yenilikçi və mütərəqqi ruhlu olduqlarını sübuta yetirmişlər.
Azərbaycan elminin inkişafında önəmli rol oynayan qadın alimlərimizdən bəhs edən Ə.Abbasov rəhbərlik etdityi müəssisədə çalışan xanımlara institutun elmi və ictimai inkişafına bəxş etdikləri töhfələrə görə təşəkkürünü ifadə edib, onlara cansağlığı, səadət və gələcək işlərində uğurlar arzulayıb.
Sonra İSİ-nin icraçı direktor vəzifəsini müvəqqəti icra edən, t.e.d., dosent Elxan Səbziyev çıxış edərək Azərbaycan qadınının öz zəkası, müdrikliyi, sədaqəti, yüksək analıq keyfiyyəti ilə hər zaman xalqın adını uca tutduğunu qeyd edib. E.Səbziyev bildirib ki, çağdaş Azərbaycan qadını fədakar ana olmaqla yanaşı, həm də peşəkar elm xadimi, bacarıqlı siyasətçi və xalqın etimadını qazanan dövlət məmurudur. Bu fəallıq Azərbaycan qadınının malik olduğu tarixi ənənələrlə yanaşı, ölkədə həyata keçirilən gender siyasətinin mahiyyətindən, onlara cəmiyyətin tamhüquqlu üzvü kimi bütün imkanlardan bərabər istifadə üçün zəruri şəraitin yaradılmasından irəli gəlir. Çıxışının sonunda institutun qadın əməkdaşlarını bu əlamətdar gün münasibətilə təbrik edən E.Səbziyev onlara xoşbəxtlik, uğur və yeni elmi nailiyyətlər arzu edib.
Daha sonra t.e.d., dosent Fəhrad Paşayev, r.e.d. İlqar Məmmədov, r.ü.f.d., dosent Ədalət Paşayev, t.ü.f.d., dosent Rəna Əsədova, r.ü.f.d., dosent Ələkbər Axundov və t.ü.f.d. Tofiq Babayev çıxış edərək bütün tarixi dövrlərdə öz istedadı, zəkası, ailəyə və vətənə bağlılığı ilə seçilən Azərbaycan qadınının milli-mənəvi dəyərlərin qorunub saxlanmasında müstəsna xidmətlərindən, elm və təhsilin inkişafında mühüm rolundan bəhs edib, institutun qadın əməkdaşlarını və onların timsalında bütün Azərbaycan xanımlarını Beynəlxalq Qadınlar Günü münasibətilə təbrik ediblər.
Tədbirin sonunda İSİ-nin Həmkarlar təşkilatının sədri Zəhra Əzizova və Qadınlar şurasının sədri, dosent Rəna Əsədova institutun elmi və ictimai fəaliyyəti ilə fərqlənmiş xanımlarına Fəxri Fərman təqdim ediblər.
