Azərbaycan Milli Elmlər Akademiyası Rəyasət Heyətinin növbəti iclası keçirilib. Tədbirdə AMEA-nın prezidenti, akademik İsa Həbibbəyli, Rəyasət Heyətinin üzvləri, AMEA-nın həqiqi və müxbir üzvləri, Rəyasət Heyəti aparatının şöbə müdirləri, gənc alimlər və aidiyyəti şəxslər iştirak ediblər.

 

Tədbirdə AR ETN İdarəetmə Sistemləri İnstitutunun (İSİ) baş direktoru, akademik Əli Abbasova AMEA-nın prezidenti, akademik İsa Həbibbəyli tərəfindən Azərbaycan Respublikasının Prezidenti İlham Əliyevin 2 fevral 2024-cü il tarixli Sərəncamına əsasən “Heydər Əliyevin 100 illiyi (1923-2023)” yubiley medalı təqdim edilib.

 

Ulu Öndər Heydər Əliyevin həyatı və fəaliyyətinin, zəngin siyasi irsinin, tədqiqi və təbliği sahəsində mühüm xidmətləri olan Ə.Abbasovun elmi-tədqiqat işlərinin əsas istiqamətləri informasiya texnologiyaları, süni intellekt və idarəetmə məsələlərinin həllinə yönəlib.

 

Akademik hazırda Beynəlxalq Elmlər Akademiyasının, Ümumdünya Elmlər Akademiyasının (TWAS), Beynəlxalq İnformatizasiya və Beynəlxalq  Mühəndislik  Akademiyalarının həqiqi üzvü, 5 xarici universititetin fəxri doktoru və Elektronika və Elektrotexnika Mühəndisləri İnstitutunun (IEEE) üzvüdür.

 

İdarəetmə Sistemləri İnstitutunun kollektivi adından informasiya texnologiyaları, süni intellekt və idarəetmə sahələrinə töhfələr bəxş edən akademik Əli Abbasovu təbrik edir, elmi və elmi-təşkilati fəaliyyətində daha böyük uğurlar arzulayırıq!