İdarəetmə Sistemləri İnstitutunun Elmi seminarı keçirilib

04.06.2024 / Xəbərlər

AR Elm və Təhsil Nazirliyi İdarəetmə Sistemləri İnstitutunun (İSİ) Elmi seminarı keçirilib. İclasda İSİ-nin “Tanıma, identifikasiya və optimal qərar qəbuletmə üsulları” laboratoriyasının kiçik elmi işçisi, institutun fəlsəfə doktoru hazırlığı proqramının “Kompüter elmləri” ixtisası üzrə doktorantı Rüstəm Əzimov “Mətnin müəllifinin identifikasiyası” adlı mövzuda məruzə edib.

Məruzəçi Rüstəm Əzimov mətnlərin müəlliflik identifikasiyasının müxtəlif məsələ qoyuluşları və məlum həll üsullarından bəhs etmişdir. Ardınca Azərbaycan dilindəki bədii əsərlər timsalında baxılan müəllif tanıma məsələsinə təklif olunan həll üsulları və aparılmış kompüter eksperimentlərinin nəticələri müzakirə olunmuşdur.

Məruzədə müxtəlif növə aid mətn əlamətlərinin və tanımada effektiv mətn əlamətlərinin seçilməsi üçün təklif edilən prosedurların müqayisəli tədqiqinin nəticələri qeyd olunmuşdur.

Məruzə iştirakçıların marağına səbəb olmuş, mövzu ətrafında müzakirələr aparılmışdır.