İdarəetmə Sistemləri İnstitutunun Elmi seminarı keçirilib

14.06.2024 / Elmi şuranın iclasları

AR Elm və Təhsil Nazirliyi İdarəetmə Sistemləri İnstitutunun (İSİ) Elmi seminarı keçirilib. İclasda İSİ-nin “Sistemli analiz, idarəetmə və informasiyanın işlənməsi” ixtisası üzrə fəlsəfə doktoru hazırlığı proqramının dissertantı Nigar Alışzadə “Süni intellekt əsaslı surdo-tərcümə üçün 3D CNN modelinin tətbiqi” mövzusu ətrafında çıxış edib.

Məruzədə Surdo-tərcümənin süni intellekt vasitəsilə həyata keçirilən sistemin işlənməsi, eşitmə məhdudiyyətli şəxslərlə ünsiyyəti asanlaşdırmaq baxımından əhəmiyyətindən bəhs olunub. Qeyd edilib ki, bu məqsədlə Azərbaycan İşarə Dili üçün vizual əsaslı tanıma sistemi hazırlanmışdır. Tanımanın əsasında hərəkətləri klassifikasiya edən üç ölçülü neyron şəbəkələr dayanır. Tanıma sistemi real vaxtda Azərbaycan İşarə Dilini videodan mətnə çevirir. Sözügedən sistem, göstərilən iradları nəzərə almaqla, eşitmə məhdudiyyətli şəxslərin cəmiyyətlə daha səmərəli ünsiyyət qurmasına və onların həyat keyfiyyətini artırmasına kömək edəcək mühüm bir addımdır.