İdarəetmə Sistemləri İnstitutunun Elmi şurasının növbəti iclası keçirilib

28.06.2024 / Xəbərlər

27 iyun 2024-cü il tarixində AR Elm və Təhsil Nazirliyi İdarəetmə Sistemləri İnstitutunun (İSİ) Elmi şurasının növbəti iclası keçirilib. İclasda Elmi şura üzvləri, şöbə və laboratoriya müdirləri, alim və mütəxəssislər iştirak ediblər.

İclası İSİ-nin baş direktoru, Elmi şuranın sədri, akademik Əli Abbasov açaraq gündəlikdə yer alan məsələləri tədbir iştirakçılarının diqqətinə çatdırıb, ilk mövzu ilə bağlı məruzə etmək üçün sözü İSİ-nin elmi katibi Zəhra Əzizovaya verib.

Z.Əzizova  institutun  II il əyani doktorantı Emin Mənsim oğlu Babayevə yeni elmi rəhbərin təyin olunması və dissertasiya işinin mövzusunun təsdiq edilməsi məsələləri ətrafında çıxış edib. Mövzu ilə bağlı müzakirələr aparılıb və müvafiq qərarlar qəbul edilib.

Sonra Ə.Abbasov AMEA-nın həqiqi üzvü, r.e.d., professor, Azərbaycan SSR Dövlət Mükafatı laureatı, Əməkdar elm xadimi Cəlal Allahverdiyevin anadan olmasının 95 illik yubileyinin keçirilməsi ilə bağlı məsələni iclas iştirakçılarının diqqətinə çatdırıb.

Daha sonra institutun İnformasiyanın intellektual emalı sistemləri laboratoriyasının müdiri, r.ü.f.d., dosent Gülçin Abdullayeva çıxış edərək görkəmli alim Cəlal Allahverdiyevin elmi və pedaqoji yaradıcılığından, Azərbyacan elminə bəxş etdiyi töhfələrdən ətraflı şəkildə söz açıb. Mövzu ilə bağlı, həmçinin akademik Telman Əliyev, AMEA-nın müxbir üzvü, professor Kamil Aydazadə, professor Kamil Mənsimov və r.e.d İlqar Məmmədov çıxış edərək öz xatirələrini bölüşüblər. Elmi şura tərəfindən akademik Cəlal Allahverdiyevin anadan olmasının 95 illik yubileyi haqqında AMEA-nın Fizika-Riyaziyyat və Texnika Elmləri Bölməsi qarşısında vəsatət qaldırılması barədə yekdilliklə qərar qəbul edilib.

Sonda İSİ-nin icraçı direktor vəzifəsini müvəqqəti icra edən, t.e.d., dosent Elxan Səbziyev cari ilin 6 ayı ərzində institutda görülmüş işlərin yekunlarına dair yarımillik hesabatı təqdim edib. E.Səbziyev əldə olunmuş elmi nəticələr, dərc olunmuş elmi əsərlər, innovasiya fəaliyyəti, qrant layihələr və kadr hazırlığı haqqında geniş məlumat verib.

İnstitutun yarımillik hesabatı ətraflı müzakirə olunaraq müvafiq qərar qəbul edilib.