İdarəetmə Sistemləri İnstitutunun əməkdaşı beynəlxalq konfransda iştirak edib

18.10.2024 / Mühüm xəbərlər

AR Elm və Təhsil Nazirliyi İdarəetmə Sistemləri İnstitutunun (İSİ) Beynəlxalq əlaqələr və innovasiya şöbəsinin müdiri, t.ü.f.d. Tofiq Babayev 16-18 oktyabr 2024-cü il tarixlərində Gürcüstanın Tbilisi şəhərində Gürcüstan Texniki Universitetinin təşkilatçılığı ilə keçirilən “Avropa-Asiya Nəqliyyat Körpüsü” (Transport Bridge Europe-Asia – TBEA2024) adlı 8-ci Gürcüstan-Polşa Beynəlxalq Elmi Konfransında iştirak edib.

Konfransın açılış tədbirində çıxış edən T.Babayev Avropa-Asiya regionunda nəqliyyat infrastrukturlarının yaradılması və istismarı problemlərinə həsr olunmuş beynəlxalq elmi konfransın önəmindən bəhs edib, sözügedən sahədə geniş spektrli məsələlərin müzakirəsi üçün mühüm elmi müzakirə platforması olduğunu bildirib.

Tofiq Babayev konfransın növbəti günü “Gürcüstanda ticarət və nəqliyyat dəhlizlərinin rəqəmsallaşmasının ən yaxşı təcrübələri” (Best Practices of Trade and Transport Corridors Digitalization in Georgia) adlı təqdimatla çıxış edib, mövzu əıtrafında müzakirələr aparılıb. Alim, həmçinin 2025-ci ilin 15-17 may tarixlərində İdarəetmə Sistemləri İnstitutunun təşkilatçılığı ilə “Şərq-Qərb Nəqliyyat Dəhlizində Logistika, İdarəetmə və İstismar Problemləri” üzrə 4-cü beynəlxalq Konfransın (PLMO2025) keçiriləcəyi barədə məlumat verib, konfransa təqdim edilən məruzələrin IEEE bazasında yerləşdiriləcəyini bildirib.

Qeyd edək ki, konfransın əsas mövzuları müasir infrastruktur və nəqliyyatla bağlı bütün əsas problemləri, o cümlədən avtomobil, dəmir yolu, dəniz və hava nəqliyyatının mövcud vəziyyəti, problemləri və inkişaf tendensiyalarını, multimodal, intermodal və birləşmiş nəqliyyat proseslərinin idarəetmə və iqtisadi aspektlərini əhatə edir.