İdarəetmə Sistemləri İnstitutunun Elmi seminarı keçirilib

17.12.2024 / Elmi şuranın iclasları

17 dekabr 2024-cü il tarixində AR Elm və Təhsil Nazirliyi İdarəetmə Sistemləri İnstitutunun (İSİ) Elmi seminarı keçirilib. Seminarda institutun Diskret optimallaşdırma modelləri və üsulları laboratoriyasının müdiri, r.e.d., professor Knyaz Məmmədov və laboratoriyanın elmi işçisi, fəlsəfə doktoru proqramı üzrə doktorant Rayihə Niyazova Tamədədli proqramlaşdırma məsələsi üçün innovativ təqribi həll üsulu mövzusunda məruzə ediblər.

Məruzədə tamədədli proqramlaşdırma məsələsinin təqribi (suboptimal) həllinin qurulması üçün işlənən yeni üsul barədə məlumat verilib. Üsulun mahiyyəti ondan ibarətdir ki, başlanğıcda hər hansı bir təqribi həll müəyyən məlum üsul vasitəsilə tapılır. Bu həllin tapılma prosesinin prinsipinə əsaslanaraq onun optimal həldən fərqlənə bilən koordinatları aşkarlanır. Bundan sonra həmin koordinatların qiymətlərini ardıcıl olaraq dəyişməklə daha yaxşı həll tapılması qaydası verilir. 

Qeyd edək ki, təklif olunmuş üsulun tətbiqi ilə bir ədədi misal həll olunmuş və müəyyən hesablama eksperimentləri aparılmışdır.