OpenAI şirkətinin baş direktoru Sam Altman gələcək GPT-4.5 və GPT-5 süni zəka modelləri ilə bağlı şirkətin planlarını ətraflı izah edib. O, X (keçmiş Twitter) sosial şəbəkəsində paylaşmış olduğu yazıda OpenAI-nin məhsul xəttinin getdikcə daha mürəkkəb hala gəldiyini etiraf edib və şirkətin təkliflərini sadələşdirmək istədiyini bildirib. "Biz model seçiciliyini sizin qədər sevmirik və yenidən sehrli, vahid süni zəkaya qayıtmaq istəyirik" - deyə Altman qeyd edib. Şirkət GPT-4.5 modelini təqdim etməyi planlaşdırır. Sam Altman-ın sözlərinə görə, bu model Orion adı ilə şirkət daxilində tanınır və "OpenAI-nin məntiq yürüdə bilməyən son modeli" olacaq.

Xatırladaq ki, OpenAI Orion modelini keçən ilin oktyabrında təlimatlandırıb. Daha sonra məlum olub ki, şirkət bu prosesi həyata keçirərkən yüksək xərclərlə və məlumat çatışmazlığı ilə üzləşib. Altman qeyd edib ki, GPT-4.5 istifadəyə verildikdən sonra əsas məqsəd "o" seriyası modelləri ilə GPT seriyası modellərini birləşdirməkdir. Bununla OpenAI bütün alətlərdən istifadə edə bilən, nə vaxt dərin düşünməli və nə vaxt daha sürətli qərar verməli olduğunu anlayan və geniş çeşiddə tapşırıqlar üçün faydalı olacaq sistemlər yaratmaq istəyir. Sam Altman-ın sözlərinə görə, ChatGPT və OpenAI API vasitəsilə şirkət GPT-5-i müxtəlif texnologiyaları, o cümlədən o3 modelini özündə birləşdirən vahid bir sistem kimi təqdim etməyi planlaşdırır.

O, əlavə edib ki, "biz artıq o3 modelini ayrıca təqdim etməyəcəyik". OpenAI o3 modelini dekabrda, onun daha sadə versiyası olan o3-mini-ni isə yanvarda istifadəyə verdi. Altman bildirib ki, GPT-5 istifadəyə verildikdən sonra pulsuz ChatGPT istifadəçiləri standart zəka səviyyəsində GPT-5-dən limitsiz istifadə edə biləcəklər, lakin sui-istifadənin qarşısını almaq üçün bəzi məhdudiyyətlər tətbiq olunacaq. Bundan əlavə, Plus tarif planında olan ödənişli istifadəçilər GPT-5-dən daha yüksək zəka səviyyəsində istifadə edə biləcəklər, Pro abunəçiləri isə daha da inkişaf etmiş zəka səviyyəsinə çıxış əldə edəcəklər. Altman GPT-4.5 və GPT-5-in dəqiq nə vaxt istifadəyə veriləcəyini açıqlamayıb, lakin bu prosesin bir neçə həftə və ya ay çəkəcəyini qeyd edib.