İdarəetmə Sistemləri İnstitutunun Elmi şurasının növbəti iclası keçirilib

18.02.2025 / Mühüm xəbərlər

18 fevral 2025-ci il tarixində AR Elm və Təhsil Nazirliyi İdarəetmə Sistemləri İnstitutunun (İSİ) Elmi şurasının növbəti iclası keçirilib.

İclası İSİ-nin baş direktoru, Elmi şuranın sədri, akademik Əli Abbasov açaraq gündəlikdə yer alan məsələləri tədbir iştirakçılarının diqqətinə çatdırıb.

Gündəlikdən irəli gələn ilk məsələ ətrafında çıxış edən Ə.Abbasov cari ildə AMEA-nın müşaviri, akademik Telman Əliyevin 90 illik, İdarəetmə Sistemləri İnstitutunun isə 65 illik yubileylərinin keçirilməsi istiqamətində qarşıda duran vəzifələri nəzərə çatdırıb, müvafiq tapşırıqlarını səsləndirib. Məsələ ilə bağlı Fizika-Riyaziyyat və Texnika Elmləri Bölməsi qarşısında vəsatət qaldırılması barədə yekdilliklə qərar qəbul edilib.

Akademik, həmçinin İSİ-nin laboratoriya müdiri, r.e.d., professor, Əməkdar müəllim Knyaz Məmmədovun 75 illik yubileyinin keçirilməsi barədə məruzə edib. O, uzun illər İSİ-də çalışan dəyərli alimin çoxşaxəli elmi fəaliyyəti, mühüm elmi nailiyyətləri və nəcib insani keyfiyyətlərindən söz açıb. Şura üzvləri tərəfindən səsvermə keçirilərək məsələ ilə bağlı Fizika-Riyaziyyat və Texnika Elmləri Bölməsi qarşısında vəsatət qaldırılması barədə yekdilliklə qərar qəbul edilib.

Sonra İSİ-nin Təhsil şöbəsinin müdiri, r.ü.f.d. Sevinc Quliyeva çıxış edərək institutun elmlər doktoru proqramı üzrə I il doktorantı Asif Əliyevin fərdi iş planının təsdiq olunması, fəlsəfə doktoru proqramı üzrə II il doktorantları Zümrüd Rəhmanovanın doktoranturaya bərpa edilməsi və Nüsrət Əliyevə yeni elmi rəhbər və dissertasiya mövzusunun təsdiq olunması məsələlərilə bağlı məruzə edib. Şura üzvləri tərəfindən müzakirələr aparılıb, səsvermə yolu ilə müvafiq qərarlar qəbul edilib.

Sonda gündəlikdən irəli gələn bir sıra cari məsələlərə baxılıb.