İdarəetmə Sistemləri İnstitutunda Xarkov Milli Radioelektronika Universitetinin beynəlxalq əlaqələr üzrə prorektoru, professor Murad Ömərovla görüş keçirilib

19.02.2025 / Mühüm xəbərlər

17 fevral 2025-ci il tarixində AR Elm və Təhsil Nazirliyi İdarəetmə Sistemləri İnstitutunda (İSİ) Azərbaycan əsilli Ukrayna alimi, Azərbaycan Respublikasının Əməkdar elm xadimi, Belarus, Rusiya və Ukrayna Tətbiqi Radioelektronika Akademiyasının akademiki, Xarkov Milli Radioelektronika Universitetinin beynəlxalq əlaqələr üzrə prorektoru, Xarkov vilayəti "Azərbaycan-Ukrayna dostluq cəmiyyəti" idarə heyətinin sədri, professor Murad Ömərovla görüş keçirilib.

Əvvəlcə akademik Əli Abbasov rəhbərlik etdiyi elmi müəssisənin tarixi, idarəetmənin nəzəri və tətbiqi problemləri, süni intellekt texnologiyaları və sosial-iqtisadi sistemlərin tədqiqi kimi əsas fəaliyyət istiqamətləri barədə ətraflı məlumat verib, institutda həyata keçirilən elmi-tədqiqat işlərindən və əldə olunan mühüm elmi nəticələrdən bəhs edib. Akademik, həmçinin Xarkov Milli Radioelektronika Universitetinin alimlərini cari ildə İSİ-nin təşkilatçılığı ilə  keçiriləcək “Şərq-Qərb Nəqliyyat Dəhlizində Logistika, İdarəetmə və İstismar Problemləri” üzrə 4-cü Beynəlxalq Konfransda (PLMO2025) iştirak etməyə dəvət edib.

Sonra çıxış edən professor Murad Ömərov İdarəetmə Sistemləri İnstitutu kimi qabaqcıl elmi-tədqiqat müəssisəsi ilə əməkdaşlıq əlaqələrinin qurulmasının hər iki ölkədə elm və təhsilin inkişafına töhfə verəcəyinə əminliyini ifadə edib, bu istiqamətdə qarşıda duran vəzifələrdən bəhs edib.

Görüş çərçivəsində sözügedən müəssisələr arasında birgə elmi-tədqiqat işlərinin yerinə yetirilməsi, beynəlxalq konfransların təşkili və kadr hazırlığı sahələrində davamlı əməkdaşlıq perspektivləri müzakirə edilib. Həmçinin İdarəetmə Sistemləri İnstitutu və Xarkov Milli Radioelektronika Universiteti arasında əməkdaşlıq barədə anlaşma memorandumunun imzalanması üçün razılıq əldə edilib.