Dinamik obyektlərin adaptiv idarə edilməsi üçün qeyri-səlis modellər sistemi işlənilmişdir

20.02.2025 / Mühüm xəbərlər

2024-cü ildə AR Elm və Təhsil Nazirliyi İdarəetmə Sistemləri İnstitutunda (İSİ) İdarəetmənin nəzəri və tətbiqi problemləri istiqaməti üzrə alınan mühüm elmi nəticələrdən biri də professor Ramin Rzayev tərəfindən “Dinamik obyektlərin adaptiv idarə edilməsi və qeyri-müəyyənlik şəraitində qərarların qəbul edilməsinin informasiya dəstəyi üçün qeyri-səlis modellər sistemi”nin işlənməsi olmuşdur.

Qeyri-müəyyənlik şəraitində dinamik obyektlərin adaptiv idarə edilməsi problemi idarəetmənin ümumi problemində əsas yerlərdən birini tutur. Hazırda bu cür problemlərin həlli informasiya emalının intellektual vasitələrini özündə ehtiva edən yeni informasiya texnologiyalarının tətbiqi əsasında mümkündür. Müasir informasiya texnologiyalarında belə vasitələr qeyri-səlis riyaziyyat və qeyri-səlis məntiqin metod və modelləri ilə birləşməsində prinsipial olaraq yeni aparat və proqram təminatı yaratmağa imkan verən neyron şəbəkələridir. Bu vasitələr qeyri-müəyyənlik şəraitində həll edilə bilən idarəetmə problemlərinin siniflərini əhəmiyyətli dərəcədə genişləndirməyə, xüsusən də proqnozlaşdırma və identifikasiya problemlərini həll etməyə imkan verir.

Tədqiqat zamanı qeyri-səlis riyazi əməliyyatların neyron şəbəkənin məntiqi bazisində realizə edilməsi üsulları və alqoritmləri işlənilmişdir. Bu da belə əməliyyatların dəqiqliyini, obyektivliyini əhəmiyyətli dərəcədə artırmağa və müəyyən tətbiq olunan məsələlərin həlli zamanı qeyri-müəyyənlik şəraitində qərarların qəbul edilməsinin effektivliyini təmin etməyə imkan vermişdir.