Neft-Kimya Prosesləri İnstitutunun əməkdaşları ilə görüş keçirildi

29.01.2019 / Xəbərlər

29 Yanvar 2019-il tarixində  Azərbaycan Milli Elmlər Akademiyasının akademik Y.H.Məmmədəliyev adına Neft-Kimya Prosesləri İnstitutunun  direktor müavini, texniki elmlər doktoru Təranə  Məmmədova və həmin institutun elmi işçisi Nadirə Həsənxanova AMEA İdarəetmə Sistemləri İnstitututun “Xarici Əlaqələr və İnnovasiya” şöbəsində    Avropa Birliyinin Horizon2020 Elmi-Tədqiqat və İnnovasiya Çərçivə proqramında Azərbaycan alimlərinin iştirakı imkanları ilə tanış olmaq məqsədi ilə görüşdə   iştirak etmişlər.

İSİ-nin  “Xarici Əlaqələr və İnnovasiya” şöbəsinin müdiri, texnika elmləri üzrə fəlsəfə doktoru, HORİZON 2020 Proqramının Qanunvericilik və Maliyyə aspektləri üzrə Milli Təmsilçisi T. Babayev qonaqlara HORİZON 2020 proqramının strukturu , tenderlərin , müvafiq mövzuların və tərəf müqabillərinin axtarışı barədə məlumat verdi və qonaqların coxsaylı suallarına cavablandırdı. Eyni zamanda qonaqlar Horizon 2020 proqramında iştirak etmək üçün alimlərin və elmi tədqiqat institutlarının AK-nın yeni yaradılmış “Funding & tender opportunities” portalında qeydiyyatdan keçmə prosedurası və Neft-Kimya Prosesləri İnstitutunun  elmi istiqamətlərinə müvafiq olan bir neçə İşçi Proqramlarla tanış oldular.

Neft-Kimya Prosesləri İnstitutunun  böyük elmi potensialının və geniş xarici əlaqələrinin mövcud olduğunu nəzərə alaraq institutun HORİZON 2020 proqramlarında real iştirakı imkanları olduğu qeyd olundu.

Görüşün sonunda T. Məmmədova və T. Babayev HORİZON 2020 proqramı çərçivəsində  iki institut arasında əməkdaşlığı davam etdirilmısinin vacibliyini qeyd etdilər.