İdarəetmə Sistemləri İnstitutunun magistrantı Beynəlxalq Olimpiadada iştirak edib
10.04.2019 / Xəbərlərİdarəetmə Sistemləri İnstitutunun I kurs magistrantı Samir Məmmədov Beynəlxalq Data Analizi Olimpiadasının (IDAO) final mərhələsində iştirak etmişdir. Olimpiadanın birinci mərhələsi 15 yanvar – 11 fevral 2019-cu il tarixlərində onlayn formada baş tutmuşdur. Birinci mərhələdə 78 ölkədən 1287 komanda Avropa Nüvə Tədqiqatları Mərkəzi (CERN) tərəfindən hazırlanmış məsələni yüksək düzgünlüklə həll etmək uğrunda mübarizə aparmışdır. Birinci mərhələnin nəticəsi olaraq 7 ölkədən 30 komanda 4-6 Aprel tarixlərində Moskvada, olimpiadanın baş təşkilatçısı Yandex-in mərkəzi ofisində həyata keçirilən finala vəsiqə qazanmışdır. Olimpiada Yandex-in baş təşkilatçılığı, Sberbank və Ali İqtisad Məktəbinin (Higher School of Economics) təşkilatçılığı ilə baş tutmuşdur. Moskvada həyata keçirilmiş final mərhələsindən sonra iştirakçılara Avropa Nüvə Tədqiqatları Mərkəzi, Yandex Taxi və Ali İqtisad Məktəbinin professor və nümayəndə heyəti tərəfindən mühazirələr təqdim edilmişdir.