İdarəetmə Sistemləri İnstitutunun Elmi seminarı keçirilib

24.04.2025 / Xəbərlər

22 aprel 2025-ci il tarixində AR ETN İdarəetmə Sistemləri İnstitutunun (İSİ) Elmi seminarı keçirilib.

Seminarda institutun İntellektual informasiya-ölçmə sistemləri laboratoriyasının müdiri, t.e.d, dosent Məzahir İsayev “Müasir ölçmə cihazlarının dəqiqliyini təmin etmək üçün avtomatlaşdırılmış kalibrləmə üsulları və vasitələri” mövzusunda məruzə ilə çıxış edib. Məruzədə Pilotsuz Uçuş Aparatlarında (PUA) quraşdırılan ölçü cihazlarının (vericilərin) ölçmə dəqiqliyinin təmin edilməsi üçün avtomatlaşdırılmış kalibirləmə üsulu və alqoritmlərin işlənməsi haqqında məlumat verilib.

M.İsayev qeyd edib ki, əlçatmaz şəraitdə istismar olunan ölçü cihazlarının (vericilərin, çeviricilərin) avtomatlaşdırılmış kalibirlənməsi əməliyyatı çox ciddi məsələdir. Bu prosesdə vericinin öz-özünü kökləməsi, çevirmə xarakteristikasının cari vəziyyətlərinin yüksək dəqiqliklə aşkarlaması (tanınması) nəticəsində yüksək ölçmə dəqiqliyi əldə olunur. Kalibirləmə prosesində etalon test siqnallarından və onların kombinasiyalarından istifadə edilir, ölçmə diapazonu boyunca hissə-hissə qeyri-xətti apraksimasiya həyata keçirilir.

Məruzə tədbir iştirakçıları tərəfindən maraqla qarşılanıb, mövzu ətrafında müxtəlif suallar cavablandırılıb.