İdarəetmə Sistemləri İnstitutunun əməkdaşı beynəlxalq ekspert seçilib
27.05.2025 / Mühüm xəbərlər
AR Elm və Təhsil Nazirliyi İdarəetmə Sistemləri İnstitutunun (İSİ) Beynəlxalq əlaqələr və innovasiya şöbəsinin müdiri, t.ü.f.d. Tofiq Babayev Asiya İnkişaf Bankı tərəfindən elan edilmiş tenderdə “Digital CAREC: National e-Logistics Platforms and Digitalization of Transport Corridors in CAREC countries” adlı CAREC İnstitutuna dəstək layihəsinin yerinə yetirilməsi üçün Beynəlxalq Ekspert seçilib.
Layihənin əsas məqsədi Azərbaycan da daxil olmaqla seçilmiş 5 CAREC (Central Asia Regional Economic Cooperation) ölkəsi: Türkmənistan, Qırğızıstan, Özbəkistan və Qazaxıstanda nəqliyyat və logistika sektorlarının rəqəmsallaşma səviyyəsinin qiymətləndirilməsi və təhlil edilməsi, milli e-Logistika platformalarının yaradılması, CAREC nəqliyyat dəhlizlərinin milli seqmentlərinin səmərəli rəqəmsallaşdırılması üçün milli elektron logistika platformalarının yaradılmasına, onların transsərhəd əlaqəsinə fərdi yanaşmaların hazırlanmasıdır. Layihənin yerinə yetirilməsi üçün bir beynəlxalq ekspert və iştirakçı ölkələrin hər birindən bir milli ekspert cəlb edilmişdir.
Beynəlxalq ekspertin əsas vəzifələrinə aşağıdakılar aiddir:
- CAREC regionunda seçilmiş ölkələrdə ticarət və nəqliyyat dəhlizlərinin rəqəmsallaşdırılması ilə bağlı ədəbiyyatı ətraflı və hərtərəfli nəzərdən keçirmək, ən yaxşı beynəlxalq təcrübələri və təchizat zəncirlərinin və nəqliyyat dəhlizlərinin rəqəmsallaşdırılmasına müasir yanaşmaları nəzərdən keçirmək;
- Tədqiqat metodologiyasını işləyib hazırlamaq;
- Mövcud Nəqliyyat Logistika Sistemlərininin (NLS) rəqəmsallaşdırma proqramlarını təhlil etmək, NLS-lərin rəqəmsallaşdırılması səviyyəsini qiymətləndirmək və onların əsas CAREC nəqliyyat dəhlizlərinin milli seqmentlərinin rəqəmsallaşdırılmasına hazırlığını qiymətləndirmək;
- Seçilmiş ölkələrdə milli e-logistika platforması layihələrinin həyata keçirilməsi üçün tövsiyələr vermək, milli seqmentlərin rəqəmsallaşdırılması üçün əsas prinsipləri və texnoloji yanaşmaları işləyib hazırlamaq;
- Rəqəmsal infrastruktur komponentləri və təklif olunan texniki yardım və potensialın gücləndirilməsi üzrə tövsiyələr təqdim etmək.
Qeyd edək ki, layihənin 4 ay ərzində həyata keçirilməsi nəzərdə tutulub.
