İdarəetmə Sistemləri İnstitutunun laboratoriya müdirinin yeni monoqrafiyası çapdan çıxıb

20.06.2025 / Mühüm xəbərlər

AR Elm və Təhsil Nazirliyi İdarəetmə Sistemləri İnstitutunun Neft sənayesində nanotexnologiyaların tətbiqinin riyazi modelləşdirmə laboratoriyasının müdiri, t.e.d., professor Eldar Şahbazovun “Neft hasilatında mürəkkəbləşmələrə qarşı yaşıl enerji və nanotexnologiyalar” adlı monoqrafiyası işıq üzü görüb.

Akademik Azad Mirzəcanzadənin xatirəsinə ithaf olunan monoqrafiyada neft və qaz hasilatında, dəniz və quruda aparılan qazma işlərində, neft-kimya sənayesində, yeraltı və yerüstü neft və qaz avadanlıqlarının səmərəli istifadə edilməsində, səthi-aktiv maddələrin işlənilməsində atom və molekul səviyyəsində aparılmış tədqiqatlar və tətbiq işləri əks olunur.

Monoqrafiyada bərk cismdə, mayedə atom və molekulyar səviyyədə manipulyasiya yaradan “kiçik təsir və həyəcan effekti” nəzəriyyəsi əsasında nanostrukturlaşmış qəfəslərin tətqiqi və tətbiqi verilmişdir. Uzun müddət istismarda olan yataqlardan qalıq neftin çıxarılmasında kollektorda mövcud mayenin realoji göstəricilərinin laya injeksiya olunan nanohissəciklərin təsiri ilə dəyişməsi nəticəsində qalıq neft hasilatının artırılması elmi cəhətdən əsaslandırılmışdır. Quyudibi zonada keçiriciliyin yaxşılaşdırılması məqsədi ilə nanokarkas yaradılmış və bu hadisə - mayenin ifratkeçiricilik xassəsi ilk dəfə olaraq müəllif tərəfindən elmi cəhətdən əsaslandırılmışdır.