İdarəetmə Sistemləri İnstitutunun Elmi şurasının növbəti iclası keçirilib

02.10.2025 / Mühüm xəbərlər

2 oktyabr 2025-ci il tarixində AR Elm və Təhsil Nazirliyi İdarəetmə Sistemləri İnstitutunun (İSİ) Elmi şurasının növbəti iclası keçirilib. 

 
İclası İSİ-nin baş direktoru, Elmi şuranın sədri, akademik Əli Abbasov açaraq gündəlikdə yer alan məsələləri tədbir iştirakçılarının diqqətinə çatdırıb.

Gündəlikdən irəli gələn ilk məsələ ilə bağlı çıxış edən Ə.Abbasov institutun baş mühasibi İsmayılova İrina Aydın qızını 65 illik yubileyi münasibətilə institutun kollektivi adından təbrik edib. O, uzun illər İSİ-də çalışan İ.İrinovanın peşəkar əmək fəaliyyəti və nəcib insani keyfiyyətlərindən söz açıb, yubilyara institutun Fəxri Fərmanını təqdim edərək yeni müvəffəqiyyətlər arzulayıb.

Sonra İSİ-nin Təhsil şöbəsinin müdiri, r.ü.f.d. Sevinc Quliyeva 2025-ci ildə institutun fəlsəfə doktoru proqramı üzrə doktoranturasına qəbul edilmiş doktorantların elmi rəhbərlərinin və dissertasiya mövzularının təsdiq olunması haqqında məruzə edib. Məsələ ətrafında şura üzvləri tərəfindən müzakirələr aparılıb, açıq səsvermə yolu ilə müvafiq qərarlar qəbul edilib.

Daha sonra İSİ-nin Elmi katibi Zəhra Əzizova i.ü.f.d., 2-ci il elmlər doktoru hazırlığı üzrə doktorant Asif Əliyevin “Ölkənin sosial dayanıqlığının qiymətləndirilməsində süni intellekt texnologiyaları” monoqrafiyası haqqında çıxış edib.

Sonra İSİ-nin icraçı direktor vəzifəsini müvəqqəti icra edən, t.e.d., dosent Elxan Səbziyev 2025-ci il üzrə laboratoriyaların elmi fəaliyyəti haqqında hesabatların hazırlanması məsələsi ilə bağlı çıxış edib. Şura üzvləri tərəfindən ətraflı müzakirə aparılıb, səsvermə yolu ilə müvafiq qərarlar qəbul edilib.

Sonda gündəlikdən irəli gələn bir sıra cari məsələlərə baxılıb.