AMEA-nın Qadınlar Şurasının bəyanatı

02.10.2020 / Xəbərlər

27 sentyabr 2020-ci il tarixindən başlayaraq Ermənistan silahlı qüvvələri işğal olunmuş Azərbaycan ərazilərindən dinc əhalinin yaşadığı yaşayış məntəqələrini və eləcə də Azərbaycan Silahlı Qüvvələrinin mövqelərini müxtəlif növ silah və artilleriya qurğularından atəşə tutur. Aralarında qadın və uşaqların  da olduğu dinc əhali arasında həlak olanlar və yaralananlar var, evlərə, təsərrüfatlara ciddi ziyan dəyir. Ermənistan beynəlxalq  hüquqdan irəli gələn öhdəliklərinə, eləcə də "Müharibə zamanı mülki əhalinin müdafiəsi" haqqında Cenevrə Konvensiyasına, BMT-nin Uşaq Hüquqları Konvensiyasına, ümumilikdə insan hüquqları sahəsində digər mühüm sənədlərin müvafiq müddəalarına əməl etməyərək mütəmadi şəkildə beynəlxalq hüququn norma və prinsiplərini kobudcasına pozur və müharibə cinayətlərini davam etdirir.

Ali Baş Komandan, respublika Prezidenti İlham Əliyevin əmri ilə ordumuz bütün təmas xətti boyu əks hücuma keçərək, düşmənin müdafiə xəttini yarıb, ermənilərin hərbi texnika və canlı qüvvəsini məhv edərək, bir sıra strateji əhəmiyyətli yüksəklik və yaşayış məntəqələrini işğaldan azad edib.

Azərbaycan xalqı döyüşlər başlayan gündən böyük ruh yüksəkliyi ilə Ali Baş Komandanın ətrafında sıx birləşərək, ordumuza tam dəstək nümayiş etdirir. On minlərlə Vətən oğlu ordu sıralarına qatılmaq üçün könüllü şəkildə cəbhəyə yollanıb. Azərbaycan xalqı torpaqlarını düşmən  işğalından azad etmək üçün əsl xalq-dövlət birliyi nümayiş etdirir.

Bu məsuliyyətli, ağır və şərəfli günlərdə bütün xalqımız kimi AMEA qadınları da cəbhədən gələn xəbərləri həyəcanla izləyir, şanlı ordumuzun işğal altındakı torpaqları azad edəcəyi günü inamla gözləyir.  

Biz AMEA qadınları bu müqəddəs amala çatmaq yolunda vuruşan Vətən oğullarına güc-qüvvət arzulayırıq. Ali Baş Komandanın dediyi kimi, “Zəfər bizimdir, biz qələbə çalacağıq”!!!

AMEA-nın Qadınlar Şurası

mənbə: science.gov.az