Riyaziyyat İnstitutunda Xocalı soyqırımına həsr olunmuş anım tədbiri keçirilib
26.02.2026 / Xəbərlər
Azərbaycan Respublikası Elm və Təhsil Nazirliyinin Riyaziyyat İnstitutunda Xocalı soyqırımının 34-cü ildönümünə həsr olunmuş anım tədbiri keçirilib. Tədbirdə institutun rəhbərliyi, şöbə və laboratoriya müdirləri, alimlər, mütəxəssislər və əməkdaşlar iştirak ediblər.
Öncə Xocalı soyqırımı qurbanlarının əziz xatirəsi bir dəqiqəlik sükutla yad edilib. Daha sonra faciənin tarixi gedişatını, törədilmiş vəhşilikləri və beynəlxalq ictimaiyyətə çatdırılan faktları əks etdirən videoçarx nümayiş olunub.
Tədbiri açan Riyaziyyat İnstitutu PHŞ-nin direktoru vəzifəsini müvəqqəti icra edən, direktor müavini, t.e.d. Elxan Səbziyev 1992-ci il fevralın 25-dən 26-na keçən gecə erməni silahlı qüvvələrinin keçmiş SSRİ-nin 366-cı motoatıcı alayının iştirakı ilə Xocalı şəhərində xüsusi amansızlıqla həyata keçirdiyi qətliamın təkcə Azərbaycan xalqına deyil, bütün bəşəriyyətə qarşı yönəlmiş ağır cinayət olduğunu vurğulayıb. O, faciənin tarixi köklərindən bəhs edərək bu hadisələrin xalqımıza qarşı aparılan uzunmüddətli işğalçılıq və etnik təmizləmə siyasətinin tərkib hissəsi olduğunu bildirib.
E.Səbziyev Xocalı soyqırımına siyasi-hüquqi qiymətin verilməsi istiqamətində atılan addımları da diqqətə çatdırıb. Qeyd olunub ki, Ulu Öndər Heydər Əliyevin təşəbbüsü ilə 1994-cü ilin fevralında Azərbaycan Respublikasının Milli Məclisi tərəfindən Xocalı soyqırımı ilə bağlı qərar qəbul edilib və 26 fevral “Xocalı Soyqırımı Günü” elan olunub. Bildirilib ki, sonrakı illərdə Prezident İlham Əliyevin rəhbərliyi ilə faciənin beynəlxalq aləmdə tanıdılması, şəhidlərin xatirəsinin əbədiləşdirilməsi istiqamətində ardıcıl və məqsədyönlü tədbirlər həyata keçirilib, dünyanın müxtəlif ölkələrində abidələr ucaldılıb, anım mərasimləri təşkil olunub.
Çıxış zamanı, həmçinin vurğulanıb ki, Müzəffər Ali Baş Komandan İlham Əliyevin rəhbərliyi ilə rəşadətli Azərbaycan Ordusunun İkinci Qarabağ müharibəsində qazandığı tarixi qələbə nəticəsində ölkəmizin ərazi bütövlüyü bərpa olunub, tarixi ədalət təmin edilib. E.Səbziyev Xocalı şəhidlərinin əziz xatirəsini ehtiramla yad edərək onların xatirəsinin xalqımızın qəlbində daim yaşayacağını bildirib.
Daha sonra professorlar Həmidulla Aslanov, Hamlet Quliyev və Riyaziyyat İnstitutunun hüquq-məsləhətçisi Vəfa Usubova çıxış edərək Xocalı faciəsinin tarixi səbəbləri, ağır nəticələri və beynəlxalq müstəvidə tanıdılması istiqamətində aparılan işlərin əhəmiyyətindən danışıblar.
Tədbirin sonunda Xocalı soyqırımı qurbanlarının əziz xatirəsi bir daha ehtiramla yad edilib və belə anım mərasimlərinin milli birliyin möhkəmləndirilməsi və tarixi həqiqətlərin təbliği baxımından mühüm əhəmiyyət daşıdığı qeyd olunub.
