Riyaziyyat İnstitutunun Elmi Şurasının ilk iclası keçirilib
13.03.2026 / Elmi şuranın iclasları
Azərbaycan Respublikası Elm və Təhsil Nazirliyinin Riyaziyyat İnstitutunda 13 mart 2026-cı il tarixində Elmi Şuranın 2026-cı il üzrə ilk iclası keçirilib. İclasda institutun rəhbərliyi, alimlər, laboratoriya rəhbərləri və elmi əməkdaşlar iştirak ediblər.
İclası Riyaziyyat İnstitutu PHŞ - nin direktoru vəzifəsini müvəqqəti icra edən, direktor müavini, t.e.d. Elxan Səbziyev açaraq, gündəlikdə yer alan məsələləri tədbir iştirakçılarının diqqətinə çatdırıb. Bildirilib ki, institutda elmi fəaliyyətin daha səmərəli təşkili, əməkdaşların elmi tədqiqat imkanlarının genişləndirilməsi və institusional idarəetmənin təkmilləşdirilməsi istiqamətində ardıcıl tədbirlər həyata keçirilir. Eyni zamanda, elmi mühitin daha da inkişaf etdirilməsi və beynəlxalq elmi əlaqələrin genişləndirilməsi institut rəhbərliyinin prioritet istiqamətlərindən biri kimi qeyd edilib.
Daha sonra institutun Elmi Şurasının tərkibi haqqında məlumat verilib. Qeyd olunub ki, Elmi Şura institutun elmi fəaliyyətinin istiqamətləndirilməsində, strateji qərarların qəbulunda və elmi layihələrin qiymətləndirilməsində mühüm rol oynayır. Şura üzvlərinin elmi potensialı və təcrübəsi institutun inkişaf strategiyasının həyata keçirilməsində əhəmiyyətli hesab olunur.
İclasın gündəliyində mühüm məsələlərdən biri də 2026-cı ildə institutun laboratoriyalarında həyata keçiriləcək elmi-tədqiqat işləri üzrə planların müzakirəsi olub. Bu çərçivədə müxtəlif istiqamətlər üzrə aparılacaq fundamental və tətbiqi tədqiqatların əsas prioritetləri müəyyənləşdirilib. Bildirilib ki, planlaşdırılan tədqiqatlar müasir riyazi problemlərin həlli, yeni nəzəri yanaşmaların işlənməsi və elmi nəticələrin beynəlxalq elmi jurnallarda dərc olunmasına yönəldiləcək.
İclasda həmçinin dissertasiya şuralarının fəaliyyəti və onların gələcək iş istiqamətləri müzakirə olunub. Bu məsələ ilə bağlı texnika elmləri doktoru Elxan Səbziyev çıxış edərək dissertasiya müdafiələrinin təşkili, elmi rəhbərlik mexanizmlərinin təkmilləşdirilməsi və doktorantların elmi fəaliyyətinin dəstəklənməsi barədə ətraflı məlumat verib.
2026-cı ildə institutda keçiriləcək elmi konfransların təşkili məsələsi də iclasın diqqət mərkəzində olub. Beynəlxalq əməkdaşlıq sektorunun müdiri, t.ü.f.d. Tofiq Babayev çıxış edərək qarşıdakı dövrdə planlaşdırılan elmi tədbirlər, beynəlxalq iştirakçıların cəlb olunması və konfransların təşkilati hazırlıq vəziyyəti barədə məlumat təqdim edib. Qeyd olunub ki, bu konfranslar institutun beynəlxalq elmi mühitdə tanınmasına və elmi əməkdaşlığın genişlənməsinə mühüm töhfə verəcək.
Gündəliyin digər məsələlərindən biri institut tərəfindən nəşr olunan elmi jurnalların fəaliyyətinin davam etdirilməsi ilə bağlı olub. Bildirilib ki, jurnalların beynəlxalq indekslərdə təmsil olunması, elmi məqalələrin keyfiyyətinin artırılması və redaksiya fəaliyyətinin təkmilləşdirilməsi istiqamətində işlər davam etdiriləcək.
İclas zamanı institutun 2026-cı il üzrə illik iş planının təsdiq edilməsi məsələsi də müzakirə olunub. Plan çərçivəsində elmi-tədqiqat fəaliyyətinin təşkili, beynəlxalq layihələrdə iştirak, elmi tədbirlərin keçirilməsi və gənc alimlərin dəstəklənməsi kimi mühüm istiqamətlər nəzərdə tutulur.
Müzakirə olunan mühüm yeniliklərdən biri də institutda elektron sənəd dövriyyəsi (ESD) sisteminə keçidlə bağlı olub. Qeyd edilib ki, bu sistemin tətbiqi sənəd idarəçiliyinin daha operativ və şəffaf həyata keçirilməsinə imkan yaradacaq. Bununla yanaşı, sistem üzrə məsul şəxslərin təyin olunması və əməkdaşların bu istiqamətdə maarifləndirilməsi nəzərdə tutulur.
İclasda “Özbəkistan–Azərbaycan” Birgə Beynəlxalq Elmi müsabiqəsinə təqdim edilən layihələr də müzakirə olunub. Bu məsələ ilə bağlı Elxan Səbziyev çıxış edərək layihələrin elmi əhəmiyyəti, beynəlxalq əməkdaşlıq imkanları və perspektiv nəticələri haqqında məlumat verib.
Gündəliyin növbəti məsələsi institutun fəlsəfə doktoru proqramı üzrə III il əyani doktorantı Şaiq Hüseynzadənin dissertasiya işi ilə bağlı olub. Müzakirələr nəticəsində doktorant üçün yeni elmi rəhbərin və yeni dissertasiya mövzusunun təsdiq edilməsi məsələsinə baxılıb.
Bununla yanaşı, fəlsəfə doktoru proqramı üzrə III il qiyabi doktorantı Zümrüd Rəhmanovaya təhsildə möhlət verilməsi məsələsi də gündəliyə daxil edilib. Bu məsələ ilə bağlı Elmi kadrların hazırlığı sektorunun müdiri, i.ü.f.d., dosent Aygün Əliyeva çıxış edərək mövcud vəziyyət və müraciətin əsaslandırılması barədə məlumat təqdim edib.
İclasın sonunda cari məsələlər müzakirə olunub, səsləndirilən təklif və rəylər nəzərə alınaraq müvafiq qərarların qəbul edildiyi bildirilib. Qeyd olunub ki, qəbul olunan qərarlar institutun elmi fəaliyyətinin daha da gücləndirilməsinə, beynəlxalq əməkdaşlığın genişləndirilməsinə və gənc alimlərin elmi potensialının inkişafına xidmət edəcək.
