İdarəetmə Sistemləri İnstitutunda 20 Yanvar şəhidlərinin anım tədbiri keçirilib

20.01.2021 / Xəbərlər

AMEA-nın İdarəetmə Sistemləri İnstitutunda 20 Yanvar faciəsinin 31-ci ildönümünə həsr olunmuş tədbir keçirildi. Tədbirdə İnstitutun rəhbərliyi, şöbə və laboratoriya müdirləri, gənc alim və mütəxəssislər iştitak edirdilər. Əvvəlcə faciə qurbanlarının xatirəsi bir dəqiqəlik sükutla yad edildi.

İnstitutun direktoru, AMEA-nın müxbir üzvü Əminağa Sadıqov iclası açaraq 20 Yanvar hadisəsinin tarixi kökləri və başvermə səbəblərindən danışdı. O bildirdi ki, Azərbaycan xalqı öz azadlığı və müstəqilliyi uğrunda tarix boyu çox sayda şəhidlər verib. Lakin onun iradəsi sınmayıb və milli ruhu sarsılmayıb. 20 Yanvar hadisələri də göstərdi ki, xalqımız öz müstəqilliyini, ölkəmizin suverenliyini və ərazi bütövlüyünü qorumaq üçün savaşmaq əzmindədir. 20 Yanvar şəhidləri də öz həyatlarını qurban verərək bunu bir daha sübut etdilər. Ə.Sadıqov qeyd etdi ki, 20 Yanvar faciəsinə və Azərbaycan xalqına qarşı törədilmiş ağır cinayətə ilk olaraq öz münasibətini və kəskin etirazını bildirən ümummilli lider Heydər Əliyev olmuşdur. Məhz Heydər Əliyev respublikamızın rəhbərliyinə qayıtdıqdan sonra 20 Yanvar faciəsinin siyasi və hüquqi qiyməti verildi. Şəhidlərin xatirəsinin əbədiləşdirilməsi üçün geniş tədbirlər planı həyata keçirildi. Ümummilli liderin siyasi kursunun  layiqli davamçısı cənab İlham Əliyev də 20 Yanvar faciəsinin qurbanlarının xatirəsini daim uca tutmuş, onların ailə üzvlərinə ardıcıl olaraq maddi və mənəvi dəstək göstərmişdir. Bu tədbirlər gənclərimizin yüksək vətənpərvəlik ruhunda tərbiyə olunmasına zəmin yaratmışdır. Məhz bu ruh Qarabağ uğrunda Vətən müharibəsində cənab Ali Baş Komandanın rəhbərliyi ilə ordumuza və xalqımıza inamlı qələbə qazandırmış, əsgər və zabitlərimizin Azərbaycanın haqq işi uğrunda mübarizə aparmaq əzmini, əsl döyüş məharətini bütün dünyaya nümayiş etdirmişdir. Ə.Sadıqov əmin olduğunu bildirdi ki, Azəbaycan xalqı və dövləti bundan sonra da Vətən uğrunda canlarını fəda etmiş şəhidlərin xatirəsini daim uca tutacaq, qazilərimizə isə hərtərəfli dəstək olacaq.

Sonra AMEA-nın müxbir üzvü Qorxmaz İmanov, professorlar Allahverdi Həsənov, Nailə Musayeva, Qəmbər Quluyev, Fərhad Paşayev, dosentlər Tofiq Babayev, Gülçin Abdullayeva, Ədalət Paşayev, Rauf Qədimov, Rəna Əsədova, Rəşad Məstəliyev və başqaları çıxış edərək 20 Yanvar tarixinin səbəb və nəticələrindən bəhs etdilər, öz xatirələri ilə bölüşdülər, bu hadisələrin Azərbaycan xalqının başına gələn dəhşətli faciələrindən biri olmaqla yanaşı, həm də xalqımızın azadlıq mübarizəsinin rəmzi, tariximizin qəhrəmanlıq salnaməsi olduğunu və xalqın yaddaşından heç vaxt silinməyəcəyini söylədilər. Vətən müharibəsində şəhid olmuş tələbələrindən söz açan professor Nailə Musayeva göz yaşlarına hakim ola bilmədi və tədbir iştirakçılarının hamısını kövrəltdi.